Nënkryetari i komisionit të posaçëm për Reformën në Drejtësi, Oert Bylykbashi, njëkohësisht edhe deputet i PD-së, ka akuzuar PS se po spekulon në mënyrë të gënjeshtërt me propozimin më të fundit të PD-së, në lidhje me draftin e Reformës. Sipas tij, nuk është aspak e vërtetë që PD-ja me propozimet e saj po synon të përfshijë politikën në procesin e përzgjedhjes në sistemin e drejtësis.
“Propozimi ynë është parimor. Do të jenë komisionerët që do të bëjnë vettingun dhe partitë politike s’do të kenë akses. Partitë politike nuk duhet të kenë rol. Vota sekrete për ata që do të votohen nga Kuvendi e bën të pamundur etiketimin politikisht të kandidatëve. Filtrimi do të bëhet jo nga politika, por nga Gjykata Kushtetuese, e cila do të garantojë që këto kandidatura janë të pastra”, ka deklaruar Bylykbashi.
Sipas tij, PD-ja ka lëvizur nga propozimi i vendeve të rezervuara të sugjeruara nga OPDAT dhe EURALIUS, dhe propozimi më i fundit garanton ato që thotë Komisioni Venecias.
“Ajo që ofron PS-ja është një formulë që nxit korrupsionin politik. PS-ja është mirë të tërhiqet nga pozicioni. Të pranojë ofertën tonë të kompromisit”, deklaroi Bylykbashi.
Me. Ar