Kanë nisur punimet për një projekt të rëndësishëm për zhvillimin e Parkut Arkeologjik Bylis-Klos. Projekti mbështetet nga Bashkimi Evropian me një fond prej 6.25 milionë eurosh dhe zbatohet nga Agjencia Italiane për Bashkëpunim dhe Zhvillim (AICS), në bashkëpunim me Ministrinë e Turizmit dhe Kulturës.
Ministri i Kulturës dhe Turizmit, Blendi Gonxhja, bëri të ditur nisjen e punimeve pas një inspektimi në terren, ku ishte i pranishëm edhe Ambasadorja e Bashkimit Evropian në Shqipëri, Sofia Moreira de Sousa, përfaqësues të AICS dhe autoritetet vendore.
Një pjesë e rëndësishme e investimit, rreth 2 milionë euro, do të shkojë për ndërtimin e një Qendre të re Multifunksionale të Vizitorëve. Qendra do të përfshijë një muze, hapësira për kërkime dhe ambiente për konservimin e objekteve arkeologjike.
Projekti parashikon gjithashtu punime për konservimin e monumenteve të Parkut Arkeologjik. Puna ka nisur tashmë në pesë monumente, ndërsa në terren janë angazhuar 11 arkeologë. Një tjetër pjesë e projektit lidhet me komunitetin dhe zhvillimin e turizmit lokal. Në kuadër të tij janë certifikuar 13 guida vendase, ndërsa janë dhënë 210 mijë euro në formën e granteve për 20 përfitues.
Ministri Gonxhja e cilësoi projektin si një etapë të rëndësishme për zhvillimin e Parkut Arkeologjik Bylis-Klos, duke theksuar se investimi synon të ruajë trashëgiminë arkeologjike, të zhvillojë turizmin dhe të krijojë më shumë mundësi për komunitetin e Mallakastrës.
“Ruajmë Bylisin, zhvillojmë turizmin, promovojmë trashëgiminë dhe krijojmë më shumë mundësi për Mallakastrën”, u shpreh Gonxhja.
