Agjencia Telegrafike Shqiptare, e vetmja agjenci zyrtare në vend, vetëm për 20 ditë ka rritur performancën e saj duke dyfishuar numrin e klikimeve, brenda dhe jashtë vendit.
E thirrur sot në Komisionin e Medias për të raportuar mbi Buxhetin e vitit 2018, drejtoresha e Përgjithshme e ATSH-së, Armela Krasniqi garantoi forcimin e rolit të ATSH-së si pikë reference për vërtetësinë e lajmit.
Duke u ndalur te performanca e institucionit, bazuar në një periudhë krahasimore 20-ditore, para dhe pas emërimit të saj në këtë pozicion, Krasniqi tha se “klikimet kanë qenë 56.517 mijë faqe të hapura, më pas nga 24 tetori kanë arritur në 110.730″.
Për lajmet e transmetuara në rrjetin social facebook, Krasniqi tha se në periudhë 1 deri në 24 tetor, kemi pasur një shfletim prej 24 faqesh në ditë, ndërkohë që sipas të dhënave krahasuese që ka nxjerrë personeli I IT, nga 24 tetor janë shfletuar 385 faqe në ditë. Në të njëjtën periudhë krahasimore nga Shqipëria, kanë shfletuar ATSH 14 mijë veta, ndërsa nga 24 tetori vizitorët kanë qenë 22 mijë vetë. Vizitorë nga Franca 3300 kundrejt aktualisht 5200, nga Kosova 1600 dhe aktualisht 3431, ndërkohë që kemi rreth 3400 vizitorë nga Gjermania nga 800 që e vizitonin faqen në të njëjtën periudhë krahasimore.”
Gjithashtu, Krasniqi bëri me dije angazhimin e saj për ndryshimin e ligjit të vjetër mbi të cilin funksionon ende ATSH, dekret ky që i përket vitit 1954. Ajo tha se do të hartohet një ligj bashkëkohor për funksionimin dhe rolin e tij.
Sipas saj, legjislacioni i ri do të jetë prioritar për 2018-ën, çka do të përcaktojë qartë sipas saj kompetencat dhe rolin e rëndësishëm që ky institucion ka ndërsa theksoi rritjen e bashkëpunimit me agjencitë e lajmeve, ndër më prestigjozet në botë.
“ATSH-ja funksionon me një dekret të vitit 1954. Ky dekret në kohën e sotme tingëllon shumë larg realitetit. Unë mendoj që nuk mund të punohet në këtë mënyrë, ndaj në muajt në vijim do të punojmë për ligjin. Është vetëm ky dekret një faqe gjithsej, kaq është ligji i ATSH-së. Unë besoj se nuk mund të funksionojë institucioni në këtë lloj kushtesh”, theksoi ajo.
Po ashtu, Krasniqi vuri në dijeni komisionin, mbi punën shumë vjeçare të ATSH-së, ku shpjegoi se deri tani ka mbi 120 marrëveshje me 120 ente të tjera, të cilët janë shtetërore ose jo, por që përfaqësojnë shtetet e tyre përsa i përket informimit publik. Mbi fokusin e lajmeve që do të ndjekë institucioni për vitin e ardhshëm, drejtoresha sqaroi se kjo do të përcaktohet edhe nga kërkesa e agjencive zyrtare në botë.
Sipas saj, agjencitë e huaja janë të fokusuara kryesisht në marrjen e lajmeve, veçanërisht në fushën e turizmit, ekonomisë, politikave fiskale të qeverisë, klimës ndaj biznesit, investimet në vend si dhe kulturën dhe traditat shqiptare.
Për buxhetin e 2018-ës, paraqiti kërkesën për shtesë fondin në investime në masën e të paktën 5 milion lekëve. Këtë shtesë në buxhet, e kërkoi për dixhitalizimin e arkivës, buletinëve që datojnë që nga 1940, që Krasniqi i konsideroi një pasuri e paçmueshme kombëtare. “ATSH ka buletinë që i përkasin viteve 1940, pra ka lajme që për mua personalisht, përbëjnë një burim informacioni për këtë periudhë të vendit, por janë edhe një mundësi studimi për kërkime shkencore. Arkivi i ATSH-së ka një pasuri të paçmueshme”.
Diskutime të shumta pati edhe për rastin e përkthimit të një deklarate të zëvendës ndihmës sekretarit amerikan të shtetit, Hoyt Brian Yee, transmetuar në Zërin e Amerikës (VOA), ku Krasniqi sqaroi lidhur me akuzat e opozitës për çështjen.
“ATSH-ja nuk ka bërë asnjë përkthim të deklaratës së zv/sekretarit amerikan të shtetit Yee. Zëri i Amerikës ka bërë një përkthim të vetin ku kishte pasaktësi dhe pas dy orësh është ripublikuar përkthimi i dytë i cili është pasqyruar në faqen e ATSH me korrektësi”, deklaroi Krasniqi. /b.d
