Për herë të parë shpenzimet buxhetore për vitin 2019 do të kapin vlerën absolute të 519.4 miliardë lekë ose 29,6% të Prodhimit të Brendshëm Bruto (PBB), çka do të përkthehet edhe në rritje të pagave për mjekët, infermierë, mësuesit dhe përfaqësive diplomatike.
Kështu deklaroi ministri i Financave dhe Ekonomisë, Arben Ahmetaj gjatë prezantimit të projektbuxhetit për 2019, në Konferencën e Kryetarëve të zhvilluar në Kuvend, mbrëmjen e së mërkurës.
“Shpenzimet buxhetore për vitin 2019, do të vijojnë të mbështesin sektorë prioritarë si arsimin, shëndetësinë, bujqësinë, infrastrukturën, të cilat do të stimulojnë më tej rritjen ekonomike të vendit, duke gjeneruar njëkohësisht punësim. Gjithashtu, mbështetja e një sërë reformash, nga ajo e Drejtësisë deri tek reforma e ujit. Për vitin 2019 shpenzimet buxhetore do të kapin për herë të parë vlerë absolute 519.4 miliardë lekë ose 29,6% të PBB, krahasuar me të pritshmin e vitit 2018, totali i shpenzimeve buxhetore programohet me rritje 5,9% më shumë”, – u shpreh Ahmetaj.
Më tej, ministri shpjegoi se në këto shpenzime përfshihet edhe rritja e pagave.
“Shpenzimet e personelit të planifikuara në masën e 80.6 miliardë lekë për vitin 2019 përveç financimit të plotë të kostos aktuale të administratës publike qendrore, reflekton koston, pra mbart koston akutale të administratës publike, mbart gjithashtu edhe politikën e rritjes së pagave për sektorin e shëndetësisë 7%, arsimit 7%, mbrojtjes 7%, sistemi terciar 7% dhe punonjësit e përfaqësive diplomatike 20%”, – sqaroi ai.
Krahas sektorëve të mësipërm, sipas Ahmetajt në këto shpenzime planifikohet kostoja e plotë e Reformës në Drejtësisë edhe për vendet e punës në institucionet e reja të drejtësisë.
“Vlen të theksohet se nga kjo rritje e konsiderueshme e pagave përfitojnë 4650 mjekë, 13.765 ndihmësmjekë, pra infermierë, 35.783 mësues, 6800 ushtarakë, 3559 efektivë të policisë së burgjeve dhe 308 diplomatë”, – përfundoi ministri i Financave dhe Ekonomisë.
