Në Kryesinë e Kuvendit u mblodh sot për herë të dytë, Këshilli Kombëtar i Integrimit Europian, një organ i ngritur rishtazi nga Kuvendi, i cili përforcon rolin e vet në monitorimin e procesit të integrimit.
Ministri Bushati tha se janë katër fushat kryesore ku Shqipëria do të kërkojë mbështetjen me projekte në takimin e Vjenës. “Së pari në infrastrukturën rrugore, në projekte për procesin e infrastrukturës energjitike, së treti kapitalet njerëzore, arsimimi dhe edukimi dhe në fund turizmi”, deklaroi ai. Kryediplomati shqiptar vlerësoi si një arritje ngritjen e Fondit të Ballkanit Perëndimor, që do të ketë selinë në Tiranë. Ai tha se do të synohet përfshija e gjithë vendeve të rajonit në këtë fond, që do të ndihmojë në hartimindhe financimin e projekteve.
Ministri Bushati gjatë fjalës së tij nënvizoi se Shqipëria ka përmirësuar ndjeshëm marrëdhëniet me Serbinë, kjo dhe për shkak të vizitave të dy liderëve të shteteve. Ndërsa, ai theksoi se po punohet për thellimin e integrimit të vendit tonë drejt BE-së.