Ministri i Punëve të Jashtme, Ditmir Bushati mori pjesë sot në punimet e ditës së dytë të Samitit të Vjenës për Ballkanin Perëndimor.
Në segmentin e Ministrave të Punëve të Jashtme u diskutua mbi strukturat ekzistuese të bashkëpunimit rajonal në Ballkanin Perëndimor, adresimin e problematikave dypalëshe pa ndikuar në procesin e integrimit evropian si dhe bashkëpunimin rinor si një promotor i normalizimit të marrëdhënieve dhe pajtimit.
Gjithashtu, në këtë segment u trajtuan edhe sfidat aktuale me të cilat përballet Evropa dhe rajoni ynë duke përfshirë ato ekonomike dhe humanitare.
Në fjalën e tij në segmentin e Ministrave te Punëve te Jashtme, Ministri Bushati evidentoi se: “Procesi i Berlinit ka arritur të prodhojë hapa konkretë pozitivë sepse vendet e Ballkanit Perëndimor kanë dëshmuar se mund të përmbushin angazhimet që kanë marrë në mënyrë kolektive. Në të kaluarën kishim një pakt stabiliteti, tanimë kemi një pakt ndërlidhjeje dhe jemi në kërkim të një pakti zhvillimor”.
Në fund të takimit, nëpërmjet deklaratës së përbashkët mbi çështjet e pazgjidhura dypalëshe, Ministrat e Punëve të Jashtme ranë dakord se çështjet dypalëshe nuk duhet të përbejnë pengesë për proceset integruese të vendeve të rajonit.
Deklaratë e MPJ mbi çështjet dypalëshe
Qeveritë e Ballkanit Perëndimor – të mbledhura në Vjenë, në praninë e Austrisë, Kroacisë, Francës, Gjermanisë, Italisë, Sllovenisë, Komisionit Evropian, si dhe EEAS (European Union External Action – Shërbimi i Jashtëm i Bashkimit Evropian) – angazhohen në zgjidhjen e të gjitha çështjeve të hapura dypalëshe në frymën e fqinjësisë së mirë dhe përkushtimit të përbashkët në rrugën e Integrimit Evropian. Qeveritë bien dakord të mos bllokojnë ose inkurajojë të tjerët në bllokimin e përparimit të fqinjëve në rrugëtimet e tyre drejt BE-së.
Qeveritë e Ballkanit Perëndimor angazhohen në zgjidhjen e çdo çështjeje të hapur përmes bisedimeve dypalëshe ose mjeteve të tjera të zgjidhjes paqësore të mosmarrëveshjeve, duke përfshirë arbitrazhin ndërkombëtar, në përputhje me të drejtën ndërkombëtare.
Qeveritë e Ballkanit Perëndimor do të raportojnë çdo vit në samitin e Ballkanit Perëndimor mbi progresin e bërë në lidhje me marrëdhëniet dhe çështjet e pazgjidhura dypalëshe.
Raporti i parë do të përgatitet nga qeveritë për t’u paraqitur në samitin që do të zhvillohet në Francë në vitin 2016. Raportet vjetore vijuese do të paraqiten në samitet e ardhshme.
Qeveritë e Ballkanit Perëndimor ftojnë qeveritë e vendeve fqinjë anëtarë të BE-së për t’iu bashkuar këtij angazhimi të përbashkët.
