Ministri i Punëve të Jashtme të Shqipëris, Ditmir Bushati mori pjesë në takimin informal të Ministrave të Punëve të Jashtme të BE, i cili u zhvillua në Luksemburg.
Sipas praktikës së konsoliduar tashmë, përveç ministrave të vendeve anëtare, në takim morën pjesë edhe ministrat e jashtëm të vendeve kandidate për anëtarësim në BE – Shqipërisë, Turqisë, Serbisë, Malit të Zi dhe Maqedonisë.
Diskutimet gjatë këtij takimi u përqendruan në çështjet e mprehta me të cilat po përballet sot kontinenti ynë si çështjet me karakter humanitar, Ukraina dhe marrëdhëniet me Rusinë, situata e sigurisë brenda BE-së dhe në rajonet fqinje me të, ekstremizmi, terrorizmi dhe luftëtarët e huaj.
Në fjalën e tij, gjatë takimit Ministri Bushati u shpreh se vala e refugjatëve që vijnë nga Lindja e Mesme dhe jugu i Mesdheut përben një fenomen tepër të ndjeshëm për ne. Kjo, tha ai, sjell në mendje kujtimet e viteve ’90 kur filluan largimet masive në Ballkan pas rënies së regjimeve totalitare e me pas shpërnguljet nga luftrat në ish Jugosllavi.
Kryediplomati shqiptar tha se “vala e refugjateve si një krizë e pa precedentë që ka goditur Evropën përbëhet nga një sërë elementesh që vendosin në sprovë aftësitë e të gjithëve dhe që kërkon një përgjigje kolektive, instrumente solidarizues për të akomoduar refugjatët, luftuar rrjetet e trafikantëve dhe elementeve terroristë që mund të kërkojnë të përfitojnë nga kjo situatë”.
Gjithashtu Ministri Bushati dhe homologët e vendeve të tjera kandidate zhvilluan dhe një audiencë me Duken e Madh te Luksemburgut Madhërinë Henry.
