Kryetari i Bashkimit Demokratik për Integrim, Ali Ahmeti, në një takim sot në Ohër me ministrin e Jashtëm të Republikës së Shqipërisë, Ditmir Bushati, bashkëbiseduan për situatën aktuale politike në vend dhe në rajon, dialogun politik, bashkëpunimin midis Tiranës dhe Shkupit, si dhe integrimin e Maqedonisë në NATO dhe BE.
Gjatë takimit kryetari Ahmeti njoftoi Bushatin mbi dialogun midis katër partive politike më të mëdha në vend me ndërmjetësimin e BE-së dhe SHBA-së si dhe për takimin e katërshes në Bruksel me Komisionerin Hahn, Sekretarin e Përgjithshëm Alain Le Roy dhe EuroDeputetin Ivo Vajgll, sipas njoftimit për shtyp të BDI-së.
BDI ka luajtur rol konstruktiv dhe të rëndësishëm në vendosjen e dialogut politik me ndërmjetësim ndërkombëtar dhe do të vazhdojë me kontributin e njejtë në bashkëbisedim me të gjitha palët.
Marrëveshja e dy qershorit është e mirë jo vetëm se i referohet themeleve të stabilitetit si marrëdhëniet ndëretnike, marrëveshjen e Ohrit, marrëdhëniet ndërfqinjësore dhe integrimin EuroAtlantik, por edhe sepse paracakton reforma të rëndësishme dhe të patjetërsueshme që duhet t’i ndërmarrim në afat sa më të shkurtër, andaj edhe palët nuk duhet që të ngrejnë dorë, por t’i tejkalojnë interesat partiakë dhe të mendojnë për vendin dhe qytetarët.
Kryetari Ahmeti gjithashtu kërkoi intensifikim të bashkëpunimit bilateral midis Shkupit dhe Tiranës nëpërmjet mbajtjes së mbledhjeve të përbashkëta qeveritare, por edhe realizimit praktik të marrëveshjeve për bashkëpunim në arsim, kulturë, etj.
