Ministri i Jashtëm, Ditmir Bushati ka deklaruar se pret që në prill Komisioni Europian do të rekomandojë nisjen e bisedimeve me Shqipërinë.
“Jemi në një fazë të rëndësishme diskutimesh me BE. Strategjia e Zgjerimit është një hap pozitiv.Në prill besojmë që Komisioni Europian do të rekomandojë nisjen e bisedimeve me Shqipërinë. Nuk ka vend për vetëkënaqësi, pavarësisht se procesi i reformave po ecën. Fillimi i bisedimeve për anëtarësim do jetë edhe më impenjativ. Presim që 2018 të jetë një dritare e artë për një vendimmarrje për nisjen e bisedimeve për anëtarësim. Do ketë fronte pune dhe bashkëpunimi me të gjithë”, deklaroi Bushati
Bushati deklaroi se reformat në fushën e sundimit të së drejtës nuk mund të konsiderohen të izoluara nga një zhvillim i qëndrueshëm ekonomik
“Jam përpjekur për ta thënë dhe në takimin e ministrave të jashtëm që janë reforma të rëndësishme, po reforma në fushën e sundimit të së drejtës nuk mund të konsiderohen të izoluara nga një zhvillim i qëndrueshëm ekonomik. Prandaj është e rëndësishme për BE dhe Ballkanin Perëndimor për të vendosur këto dy komponentë të strategjisë së zgjerimit në një barazpeshë sa më të mirë. Veçantia tjetër që duhet të kemi në vëmendje është fakti që në rajon ka ende mosmarrëveshje dypalëshe që lidhen me çështjet e njohjeve shtetësisë, bashkëpunimin përsa i përket tribunaleve ndërkombëtare dhe përkatësinë apo jo europiane në veprime konkrete. Janë patate të nxehta që kur vjen puna te debati për datat do të duhet të mbahen parasysh sepse strategjia nxjerr mësime nga të gjitha proceset e tjera të zgjerimit duke vendosur zgjidhjen apo trajtimin e çështjeve dypalëshe nga vetë vendet, në një moment para se këto vende të anëtarësohen”, tha Bushati.
a.ç
