Ministri i Jashtëm Ditmir Bushati ka përshendetur miratimin e projekt-rezolutës për Shqipërinë nga Komiteti i Çështjeve të Jashtme të Parlamentit Europian.
“Përcolla me kënaqësi mbështetjen e gjerë që mori projekt-rezoluta për vendin tonë, në Komitetin e Çështjeve të Jashtme të Parlamentit Europian. Dëshiroj të vlerësoj kontributin e raporterit Knut Flenckenstein në paraqitjen e një raporti të balancuar dhe inkurajues, që konfirmon arritjet në reformat e ndërmarra nga qeveria, të evidentuara më parë edhe nga Komisioni Europian dhe Vendet Anëtare të BE-së dhe nxit progresin e tyre të mëtejshëm”, thekson shefi i diplomacise shqiptare.
Sipas tij, ajo që thuhet qartësisht në projekt-rezolutë, është çka kemi përsëritur vijimësisht pas marrjes së dritës së rekomandimit nga Komisioni për hapjen e negociatave: progresi në reformën në drejtësi, veçanërisht zbatimi i ligjit të vettingut është thelbësor për uljen në tryezën e bisedimeve të anëtarësimit.
Me 62 vota pro, 6 vota kundër dhe 4 abstenime, Komiteti i Jashtëm në Parlamentin Europian miratoi të martën pasdite Draft-rezolutën për Shqipërinë. Në dokument vlerësohet progresi i vazhdueshëm mbi reformat që lidhen me BE-në, në veçanti për ndryshimet kushtetuese që i hapën rrugën reformës së thellë e tërësore në sistemin e drejtësisë. Megjithatë, “Shqipëria nevojitet të zbatojë në mënyrë të besueshme reformat që lidhen me BE-në dhe të sigurojë që zgjedhjet parlamentare të qershorit të jenë të lira e të ndershme, nëse duhet të nisë negociatat e anëtarësimit në BE”, thuhet në rezolutë.
ma.me
