Ministri për Evropën dhe Punët e Jashtme, Ditmir Bushati ndodhet në Milano për të marrë pjesë në punimet e takimit të 25-të të Këshillit Ministror të OSBE-së. Në ditën e parë, ministrat e Jashtëm te kësaj organizate diskutuan mbi rolin e OSBE dhe përpjekjet e përbashkëta për zgjidhjen e konflikteve dhe adresimin e sfidave me të cilat përballet sot siguria dhe stabiliteti në hapësirën e OSBE-së.
Në ditën e parë të punimeve, Ministri Bushati nënvizoi se, Shqipëria mbështet plotësisht prioritetet e kryesisë italiane të prezantuara në fillim të këtij viti, për të forcuar kapacitetet e OSBE-së dhe qasjen e saj pro-aktive në sigurinë kombëtare dhe ndërkombëtare, bashkëpunimin ekonomik dhe mjedisor, dialogun politik dhe ushtarak si dhe respektimin e të drejtave të njeriut dhe parimet themelore.
Shqipëria, tha Bushati, do të vijojë të japë kontributin e saj të çmuar jo vetëm në zbatimin e paqes dhe stabilitetit në rajonin e Ballkanit, por edhe në të gjithë rajonin e OSBE-së.
Ministri vuri theksin në rindërtimin e besimit dhe dialogut konstruktiv për përballjen e sfidave kritike dhe komplekse si konfliktet, ekstremizmi i dhunshëm, terrorizmi, kërcënimet kibernetike, rrjedhat e emigrantëve, krimi i organizuar apo edhe pengesat në zhillimin ekonomik.
“Kërcënimet e tilla transnacionale kanë nevojë, me çdo kusht, për një transparencë dhe parashikueshmëri më të madhe. Besimi dhe dialogu konstruktiv janë mjetet kyçe që do të na mundësojnë të ndajmë më shumë informacion dhe të trajtojmë së bashku sfidat aktuale dhe të ardhshme në zonën e OSBE-së”, u shpreh ministri Bushati në fjalën e tij.
Ministrat shkëmbyen mendime gjithashtu mbi forcimin e rolit dhe kapaciteteve të OSBE-së si dhe kontributin e secilit për nxitjen e bashkëpunimit mes vendeve të OSBE-së, nevojën e vendosjes së dialogut dhe përgjegjësisë së përbashkët për respektimin e parimeve dhe unitetit të Organizatës.
Gjatë punimeve të Ministerialit të Milanos, Ministri Bushati pati takime dypalëshe me përfaqësues të lartë të institucioneve të OSBE si dhe me homologë të pranishëm në Milano./a.meta
