Në Rodos të Greqisë ka filluar Konferenca e 3-të për Sigurinë dhe Stabilitetin, me pjesëmarrjen e 25 përfaqësive nga vendet e Europës Juglindore, të Mesdheut, të Lindjes së Mesme, OKB-së, Organizmit për Bashkëpunimin e Vendeve Arabe, si dhe vëzhguesve nga Vietnami, Kolumbia dhe Indonezia.

Në konferencë merr pjesë edhe ministri i Jashtëm i Shqipërisë, Ditmir Bushati, i cili do të takohet në kuadër të saj edhe me homologun e tij grek, Nikos Kotzias.

I pyetur për këtë takim gjatë mbërritjes së tij në sallën e konferencës, Bushati ka deklaruar:

“Është edhe ky takim (me Kotziasin) pjesë e vizitës sime këtu. Ne po diskutojmë dhe do të vazhdojmë të diskutojmë me mikun tim, Nikos Kotzias, për axhendën dypalëshe. Siç e dini, ne kemi bërë progres thelbësor në shumë çështje kohët e fundit”.

Gjatë fjalës së tij. Bushati u ndal tek nevoja e bashkëpunimit mes vendeve, në përballjen me sfidat aktuale të sigurisë dhe nënvizoi nevojën e një bashkëpunim të përforcuar dhe kreativ për të përballuar sfidat e sigurisë, të cilat janë prezente për një kohë të gjatë.

“Kemi një dinamikë të re për çështjet e migracionit pasi burimet e konfliktit nuk janë adresuar ende, por për fat të keq egoizmi po mbizotëron në trajtimin e kësaj çështje duke e vendosur solidaritetin aq shumë të nevojshëm në plan të dytë”, nënvizoi ministri.

Në mediet greke është bërë tashmë i njohur lajmi se, Athina zyrtare do të përfundojë brenda pak kohësh edhe paketën e çëshjeve me Shqipërinë, pas nënshkrimit të marrëveshjes së Prespës, që arritën Athina dhe Shkupi në lidhje me çështjen e emrit të fqinjit verior të Greqisë.

a.ç