Ministri i Punëve të Jashmte, z. Ditmir Bushati, mori pjesë në Ditën e Bashkëpunimit Rajonal, organizuar në Bruksel nga Këshilli i Bashkëpunimit Rajonal (RCC) dhe nga Përfaqësia në BE e Landit të Baden-Vyrtemberg.
Ministri Bushati, në cilësinë e kryesuesit të radhës të SEECP, dhe Komisioneri Hahn ishin folësit kryesorë në Konferencën e Nivelit të Lartë për Bashkëpunimin Rajonal dhe Zgjerimin në Ballkanin Perëndimor. Në Konferencë ishin të pranishëm Ministrat e Jashtëm të rajonit, përfaqësues të lartë të Komisionit Evropian dhe të Landit të Baden-Vyrtembergut, anëtarë të Parlamentit Evropian, përfaqësues të shoqërisë civile, të komunitetit të biznesit dhe të medias në Bruksel.
Në fjalën e tij Ministri Bushati, duke prezantuar ecurinë e Kryesisë shqiptare të SEECP-së për periudhën 2014-2015, nënvizoi vlerësimet e Këshillit të BE-së, të datës 16 dhjetor 2014, për rolin e SEECP-së në promovimin e bashkëpunimit rajonal dhe të integrimit në BE. Në mënyrë të veçantë ai u ndal në arritjet e bashkëpunimit rajonal, veçanërisht në kuadër të përgatitjeve për Konferencën e Vjenës dhe nënvizoi rëndësinë që merr rajoni i Ballkanit Perëndimor në situatën aktuale të sigurisë në lindje të kontinentit dhe të flukseve migratore në Mesdhe.
Me tej Ministri u shpreh se: “integrimi evropian dhe bashkëpunimi rajonal janë dy procese të ndërthurura, që nuk mund të shmangin njeri-tjetrin, ndaj në këtë kuptim të gjitha vendet e rajonit duhet të bashkërendojnë politikat e tyre zhvillimore në kuadër të agjendës së ndërlidhjes rajonale“. Gjithashtu Ministri u ndal në rëndësinë që ka ruajtja e fokusit të BE-së ndaj Ballkanit Perëndimor dhe veçanërisht sa i përket avancimit të shpejtë të rajonit drejt anëtarësimit, si domosdoshmëri edhe për vetësigurinë e vendeve anëtare.
Ministri falënderoi Komisionerin Hahn për mbështetjen e vazhdueshme dhe vizionin e qartë të Komisionit për nevojat, ambicien dhe mundësitë aktuale të vendeve të rajonit.
Pjesëmarrësit në panelet e konferencës vlerësuan ecurinë e deritanishme në fushën e reformave në kuadër të bashkëpunimit rajonal. Përfaqësuesit e KE-së siguruan për mbështetjen e tyre për proceset e integrimit rajonal në Evropën Juglindore, duke nënvizuar se shpejtësia e këtij procesi varet nga zbatimi dhe qëndrueshmëria e reformave të ndërmarra nga secili prej vendeve.
