Ministri i Punëve të Jashtme, Ditmir Bushati, tha sot se në tryezën e negociatave Shqipëria është e barabartë me Greqinë.
I pyetur nga gazetarët, kreu i diplomacisë komentoi qëndrimin e Presidentit Meta një ditë më parë, kur ky i fundit u shpreh se pa krijimin e Gjykatës Kushtetuese nuk do të ketë ratifikim të marrëveshjes.
“Në këtë proces Presidenti ka dhënë autorizimin për mua si ministër. Unë kam lëshuar plotfuqishmërinë për ekipin dhe negociatat nuk kanë përfunduar. Deri në momentin që përfundojnë negociatat, ne e shohim veten si pjesë të ekipit ku është edhe Presidenti” – tha Bushati.
Ai tha se në përfundim të negociatave, dosja do të dorëzohet pranë Presidentit të Republikës ku ekspertët do të bëjnë vlerësimin e asaj që është arritur.
“Më habit që Presidenti ka ndryshuar qëndrim, por kush jam unë që të gjykoj të parin e shtetit? Unë jam thjeshtë një ministër” – tha Ditmir Bushati.
Deklarata e Presidentit Ilir Meta për ‘Zërin e Amerikës’
Ramës ia kam bërë të qartë, që është shumë e rëndësishme që një marrëveshje e tillë të ratifikohet në Parlament, kur të kemi një Gjykatë Kushtetuese, pasi në të kundërt nuk do t’i shërbente zgjidhjes përfundimtare të kësaj çështje.
/JavaNews/b.d
