Ministri i Jashtëm Ditmir Bushati ka pritur homologun e tij britanik Philip Hammond. Dy krerët e diplomacisë ishin në një linjë kur thanë se bashkëpunimi mes Shqipërisë dhe Britanisë duhet të intensifikohet, në lidhje me luftën kundër terrorizmit.
“Shqipëria do të jetë përkrah vendeve aleate të NATO-s në luftën kundër terrorizmit. Ajo është pjesë e koalicionit ndërkombëtar dhe ka një bashkëpunim të shkëlqyer në NATO”, tha Bushati.
Në të njëjtat linja, shefi idiplomacisë britanike ka falenderuar Shqipërinë për këtë mbështetje.
“Të intensifikojmë luftën kundër terrorizmit dhe të ecim përpara së bashku. Britania i shpreh falenderimet e saj Shqipërisë”, ka thënë Hammond.
Nga ana tjetër Hammond ka shprehur mbështetjen e vendit të tij për të ardhmen evropiane të Shqipërisë ndërsa ka vlerësuar ecurinë e reformave të deritanishme, duke vënë theksin tek ajo e drejtësisë.
“Mbështesim fuqishëm anëtarësimin e Shqipërisë në BE dhe mirëpresim ecurinë me reformat. Pjesa më e rëndësishme e kësaj pakete është ajo e drejtësisë. Ne presim të shikojmë këtë program i cili duhet të nxjerrë rezultate në formën e ndjekjes penale kundër zyrtarëve të lartë. Shteti ligjor dhe reformat ekonomike janë kyçe për zhvillimin e një vendi, edhe për nxitjen e investimeve të huaja,” u shpreh Hammond.
