“Ne synojmë që nga tani dhe deri në qershor të kemi disa hapa në këtë drejtim që do t’i lejonin BE-së të marrë vendimin final”, tha ministri.
“Në 4 vitet që shkuan janë bërë disa hapa, politika e hapave të vegjël që do i shërbente marrëdhënieve. Janë bërë hapa konkretë përpara si për marrëveshjen për toponimet apo çështje të tjera të ndjeshme për qytetarët tanë. Kemi ngritur një mekanizëm komunikimi në nivel zv.ministrash. Kemi arritur në një moment përcaktues, ku bashkë me homologun Kotzias do të ulemi në një tavolinë ekspertësh për të trajtuar ato çështje që meritojnë zgjidhje gjithmonë të bazuar në të drejtën ndërkombëtare. Nga dreka e djeshme që pata me Kotzias ka një disponibilitet edhe nga ana e Greqisë për t’u përfshirë në këtë proces. Nuk besoj se është në interesin dhe dëshirën e Greqisë për të vendosur kushtëzime për perspektivën europiane të Shqipërisë, por siç u bë e qartë edhe në programin e prezantuar nga kryeministri jemi të interesuar për një marrëdhënie të drejtë me Greqinë dhe që sjell zgjidhje të drejta për të dyja palët. Kemi rënë dakord për një kalendar të qartë aktivitetesh për të përshpejtuar zgjidhjet”, deklaroi Bushati.
