Deputeti i Partisë Socialiste Ditmir Bushati ka kërkuar sot në Parlament një pakt kombëtar në emër të integrimit evropian. Ai ka deklaruar se përgjegjësia për përparimin e vendit drejt këtij objektivi është e përbashkët dhe vetëm së bashku mund të arrihet suksesi.
“Leksioni numër një që kam nxjerrë gjithmonë ka qenë që për këtë proces në mënyrë që të përparojmë ne na duhet konsensus kombëtar, sepse për fat të keq kur shohim të gjithë historikun në këtë proces ne kemi notuar kundër rrymës. Kjo është arsyeja që kam propozuar një pakt kombëtar për Europën që secili bën detyrat që i takon. Nuk diskutohet, barrën kryesore në këtë proces e ka qeveria, por përgjegjësia është e përbashkët. Reforma zgjedhore ka 1 vit e gjysmë që është në tryezën tonë të diskutimeve, por në rast se zgjedh që të lësh parlament siç është rasti sot i PD apo i LSI nuk mund të kërkosh që kjo gjë duhet të ishte bërë. Ne kemi nevojë për të përcaktuar së bashku themelet e shtëpisë,” u shpreh Bushati.
Deputeti socialist duke folur edhe mbi “po”-në e Bundestagut gjerman për çeljen e negociatave për Shqipërinë u shpreh se i gjithë debati dhe akuzat e opozitës kanë qenë absurde.
“I gjithë debati politik dhe publik për rezolutën e Bundestagut gjerman për Shqipërinë dhe Maqedoninë e Veriut është disi artificial. E para, s’duhet të na vijë surprizë. Gjermania është një partner i ndershëm, kritik i drejtë, ka mbajtur të njëjtin qëndrim në rastin e krizës greke dhe krizës në eurozonë, duke qenë se është një vend që mban peshën kryesore në BE, është një vend që për herë të parë në procesin e zgjerimit e formalizoi procedurën e zgjerimit dhe në Ballkanin Perëndimor. Është absurde e gjithë lufta politike që ven sidomos nga opozita jo parlamentare e cila kërkon të legjitimojë kauzën e saj përmes disa detyrave të shtëpisë që vendos Bundestagun gjerman që në finale nuk janë detyra shtëpie vetëm për Shqipërinë, por është dhe vija e sjelljes që një parlament i përcakton qeverisë nga edhe e ka marrë besimin,” deklaroi Bushati.
/a.r
