Për të katërtin vit radhazi, Fondacioni Mane mbështet me bursë të plotë studentët më të mirë të nivelit Master nga Fakulteti i Ekonomisë, Universiteti i Tiranës. Këtë vit janë dhënë gjashtë bursa në programe studimi si: Turizëm, Ekonomiks, Siguri Informacioni dhe Financë.
Ceremonia e ndarjes së bursave u zhvillua në ambientet e Fakultetit të Ekonomisë, ku ishin të pranishëm studentët, themeluesi i Fondacionit Mane dhe Presidenti i Grupit BALFIN, Samir Mane, si dhe Dekani Asoc. Prof. Dr. Bernard Dosti.
Në fjalën e tij, Samir Mane theksoi rëndësinë që Fondacioni Mane, përmes programit B4Students, i kushton edukimit të të rinjve dhe mbështetjes së studentëve që tregojnë ambicie dhe dëshirë për t’u rritur si profesionistë apo si sipërmarrës.
Ai nuk ngurroi të vlerësojë punë e bërë nga Fakulteti i Ekonomisë në drejtim të profesionistëve të cilët japin një kontribut të rëndësishëm për kompanitë private në vend.
“Suksesi është një rrugëtim që nuk njeh ndalesa dhe për ta vazhduar atë bashkarisht, dijeni se mbështetja jonë nuk do të mungojë për asnjë moment; jo vetëm në kuadër të zhvillimit akademik, por për praktika të vlefshme në kompanitë e Grupit BALFIN, të cilat të orientojnë drejt tregut të punës i përgatitur dhe i sigurt” , iu drejtua Mane studentëve të pranishëm ndërsa shtoi një fakt mjaft interesant, se mbi 450 ish-studentë të Fakultetit të Ekonomisë janë aktualisht të punësuar në kompanitë e Grupit BALFIN në vend. Gjithashtu, 20 studentë nga ky fakultet, falë programit B4Students, po vijojnë aktualisht praktikën në kompanitë e grupit.
Dekani i fakultetit, Asoc. Prof. Dr. Bernard Dosti risolli në vëmendje marrëvëshjen e nënshkruar të bashkëpunimit me Grupin BALFIN dhe tha se ajo do të vijojë edhe më tej, në sajë të vizionit të përbashkët për një ekonomi të qëndrueshme. Ai i mëshoi rëndësisë që ka ky bashkëpunim, duke e cilësuar si shembull që tregon se si sipërmarrja private mund të kontribuojë në përmirësimin e sistemit arsimor.
“Jam i lumtur që marrëveshja e bashkëpunimit me Grupin BALFIN nuk është një marrëveshje në letër, përkundrazi. Ajo është konkretizuar në mënyrë shumë domethënëse dhe do të vijojë të japë më të mirën, si për fakultetin dhe studentët e saj, ashtu edhe për zhvillimin e qëndrueshëm të ekonomisë. Eshtë padyshim një akt i ndërmarrë që dëshmon më së miri se si sipërmarrja private mund të nxisë një sistem arsimor më cilësor” , u shpreh dekani i Fakultetit të Ekonomisë, Bernard Dosti.
Në harkun kohor të katër viteve, bashkëpunimi mes Fakultetit të Ekonomisë dhe Grupit BALFIN ka sjellë investime me vlerë si: 1 laborator modern informatike, praktika bashkëkohore profesionale pranë kompanive të Grupit, organizim konferencash akademiko-shkencore, si dhe aktivitete të shumta me në qendër zhvillimin akademik dhe profesional të të rinjve. Fondacione Mane i bashkohet qëllimeve të Grupit BALFIN përmes programit B4Students dhe bursave të studimit, ku studentët përfitojnë përvoja praktike dhe aftësi të vlefshme për karrierën e tyre.
