Kryesocialisti Edi Rama është ndalur sot në Burrel ku ka prezantuar Adelina Farricin, e cila rikandidon për postin e kreut të bashkisë. Duke kërkuar votën e qytetarëve, Rama theksoi se Burreli do të ketë më shumë investime mandatin tjetër të Farricit.
“Kemi shumë punë për të bërë dhe ne duhet të ecim shpejt përpara. Duhet t’i japim shkëlqim qytetit të Burrelit. Investoni votën për garanci. Kjo nuk është votë politike por është një votë për t’i dhënë më shumë mundësi familjes dhe përmirësimi të cilësisë së jetës suaj. Adelina është model suksesi” – tha kryeministri.
Gjatë fjalës së tij, Kryeministri akuzoi të djathtën, duke thënë se ata nuk kanë vizion për të ardhmen.
“Partia Demokratike nuk ka vizion për të ardhmen dhe nuk ka asnjë projekt për të ardhmen. Kreu i kësaj partie në katër vitet e drejtimit të Bashkisë së Tiranës nuk ka bërë asgjë, por vetëm gjumë me gërrhitje. Kur ishte ministër i Transportit, mbahet mend për 230 milionë eurot që ikën në drejtim të paditur. Kur qe ministër i Jashtëm humbi 300 mijë km det, i cili u bë i grekëve dhe kur qe ministër i Brendshëm mbylli sytë për katër të vrarët. Partia Demokratike nuk do kryetar Bashkie. Ata të djathtës nuk i kanë sjellë asnjë projekt” – u shpreh Rama para qytetarëve.
Ai tha se qeveria do të investojë në shumë projekte, të cilat një pjesë kanë nisur që të marrin drejtimin e duhur.
