Ministria e Drejtësisë ka përkrahur një sërë nismash në sistemin penitenciar duke i ofruar mundësi grave të burgosura që të angazhohen në punë konkrete për të gjeneruar të ardhura.
Përmes një bashkëpunimi me organizatën shqiptare “Orkidea”, ky institucion ka menduar t’i krijojë kushtet për të punuar në ambientet e burgut mbi projektin “Made in Prison”.
Ky i fundit është një ndër këto nisma mjaft interesante, që ka në fokus, jo vetëm përfshirjen e tyre për të punuar por edhe ardhjen në ndihmë, sa i përket aspektit financiar të tyre.
Këto produkte mund t’i gjeni dhe t’i blini në këtë adresë në internet: “madeinprison.al”.
Nisma është përkrahur edhe nga ministrja e Drejtësisë Etilda Gjonaj e cila herë pas here ka promovuar punimet e zonjave që vuajnë dënimin duke përcjellë edhe mesazhe konkrete në funksion të rehabilitimit të tyre.
Nga ana tjetër, drejtoresha Alma Kordonit, ka shpjeguar për SCAN se ky projekt lindi si një nismë e frymëzuar nga vetë gratë dhe vajzat e burgut 325.
“Po, ka patur mbështetje nga ministria e Drejtësisë, e cila, herë pas here, e ka promovuar këtë iniciativë dhe është treguar shumë bashkëpunuese në rregullimin e praktikës ligjore, sa i përket dërgesave të parave në rrugë bankare, tek të gjitha grate, pavarësisht vështirësive që vazhdojnë të jenë prezente me disa nga gratë. Kjo nismë, që në fillimet e saj, ka patur gjithashtu mbështetjen e padiskutueshme nga Drejtoria e Përgjithshme e Burgjeve si dhe Drejtoria e Institucionit të Ekzekutimit të Vendimeve Penale nr 325, Tiranë. Kjo e fundit ka lehtësuar punën e stafit të organizatës dhe ka bashkëpunuar, që të gjitha sfidat të kalohen dhe rikuperohen, duke ofruar zgjidhje praktike dhe në kohë”, shprehet Kordoni.
Ndërkohë ajo ka folur edhe për produktet që prodhojnë gratë e burgut.
“Gratë dhe vajzat përgatisin punime me dorë.Çdo produkt është unik edhe nëse ai porositet, nuk riprodhohet, por rimodifikohet si modeli i preferuar i klientit. Ne kemi synuar edhe riciklimin e produkteve me të cilat jemi përpjekur të prodhojmë produkte të reja, duke synuar edukimin e grave, si fillim, por edhe tregun. Jemi ende në fillimet tona. Gratë dhe vajzat ndihmohen dhe mentorohen nga dizenjatorja, Erinda Veseli, e cila ka dhënë një ndihmesë shumë të çmuar në këtë proces. Ajo i ka ndihmuar ato të përmirësojnë punën e tyre si dhe i ka nxitur drejt produkteve cilësore dhe të përshtatshme për tregun”, shprehet ajo në një intervistë për scan.
