3.3 milion euro janë paguar nga buxheti i shtetit dhe drejtoria e burgjeve për 4 kompanitë e ushqimit tashmë në hetim për shkelje të barazisë në tendera dhe falsifikim dokumentesh.
Report Tv ka siguruar faksimile të transaksioneve nga thesari i shtetit ku rezulton se në krye të kompanive që kishin ekskluzivitetin e furnizimit me ushqime për të burgosurit rezulton “Vllaznia” Shpk me 24.5 milion lekë për vitin 2016.
Aktualisht në pranga ka rënë administratori i kësaj kompanie Ylli Kalaja i cili është hetuar së bashku me zv/drejtorin e burgjeve Iljaz Labi dhe ky i arrestuar.
Pas kompanisë së Kalasë renditet kompania Dogel me 12.2 milion lekë dhe administrator Elidjan Laskaj. Kjo firmë paratë i ka fituar për shërbimin “Furnizime dhe shërbime me ushqim për mencat”.
Kompania e tretë për nga fitimi renditet M.B Kurti me administrator Shemsi Sinanin me një total prej 10.3 milion lekë nga viti 2015 me përshkrimin e faturave “Te tjera materiale dhe shërbime speciale”.
Administratori Nexhmi Balla dhe kompania e tij Nelsa renditet e katërta për nga paratë e marra me 7.4 milion lekë prej shkurt 2016 kur ka marrë dhe pagesën e parë për shërbimet “Furnizime dhe shërbime me ushqim për mencat”.
Për këto katër firma dhe zv/drejtorin e burgjeve tashmë ka nisur një hetim nga ku është mundur të faktohet me përgjim ryshfeti i kërkuar në 20 milion lekë nga firmat që fitonin tenderin për të furnizuar me ushqime burgjet.
Report Tv ka mësuar nga burime pranë drejtorisë së burgjeve se me anë të një shkrese i është kërkuar agjencisë së prokurimit publik të shpall procedurat e reja të tenderimit dhe të shkëpus menjëherë kontratat me firmat nën hetim.
Shqiptarja.com/d.i.
