Gjykata e Krujës ka lënë në burg 4 prej të arrestuarve në Nikël, që u prangosën tre ditë më parë gjatë një operacioni të forcave speciale.
Konkretisht, u lanë në burg Ylli Çangu, Valter Bami, Skënder Leza dhe Marklen Haka. Ndërsa i arrestuari i pestë Lutfi Haka u la i lirë, pasi gjykata vendosi për të “arrest shtëpie”. Ata akuzohen për armëmbajtje pa leje, mbajtje pa leje e armëve të ftohta dhe pastrim parash.
Gjatë operacionit të RENEA e FNSH në Nikël, në banesët e të arrestuave u gjetën dhe sekuestruan 2 pistoleta, 4 armë gjahu, 30 mijë Euro dhe 30 milionë Lekë të vjetra cash.
Seanca në Gjykatën e Krujës ndaj të “fortëve” të zonës së Nikelit, u zhvillua nën masa të rrepta sigurie.
***
Nën masa të forta sigurie ka nisur seanca gjyqësorë në Gjykatën e Krujës, ku pritet të jepet masa për 5 të arrestuarit gjatë aksionit të policisë në Nikël.
Gjykata është rrethuar nga forca të shumta policore, ndërkohë që masa e sigurisë është dhënë për Ylli Çangun, Valter Bamin dhe Mareklen Hakën, të cilët kanë mbetur në burg, ndërkohë që vazhdon seanca për 3 të ndaluarit e tjerë.
Nga aksioni i pak ditëve më parë nga forcat RENEA u arrestuan pesë persona, konkretisht Lutfi Haka 67 vjeç, Marklen Haka 27 vjeç, Ylli Çangu, 42 vjeç, Skënder Leza, 34 vjeç, Valter Bami,.32 vjeç.
Në banesat e tyre policia gjeti dhe sekuestroi dy pistoleta dhe tre armë gjahu.
Ishte ora 05:30 minuta e mëngjesit të 12 shtatorit, kur në fshatin Nikël u ndërpre energjia elektrike dhe grupet e forcave speciale të RENEA-s e FNSH nisën kontrollet në shtëpinë e personave të dyshuar për veprimtari kriminale
Aksioni nuk hasi rezistencë, ndërsa gjatë ndërhyrjes u shoqëruan 11 persona, por urdhërarrestet u prenë vetëm për pesë prej tyre.
Policia deklaroi se aksioni ishte finalizim i një pune hetimore disa mujore mbi veprimtarinë e Grupit të Niklës, me përgjime gjurmim e mbledhje të dhënash në rrugë operative.
Gjatë kontrollit të banesave dhe ambienteve të tjera, policia gjeti dhe sekuestroi, armë zjarri, një prej të cilave me dylbi, municione, mjet të blinduar, euro, dollarë e lekë si dhe sende të tjera të poseduara në mënyrë të paligjshme.
Ndaj të arrestuarve është ngritur akuza armbajtje pa leje dhe pastrim i produkteve të veprës penale, ndërsa hetimet për tej do ti ndjekë prokuroria e Krujës.
a.ç
