Trajneri i Kosovës në futboll, Albert Bunjaki ka thënë se nëse arrihet fitore kundër Kroacisë atëherë ajo do të ishte e rastësishme, pasi sipas tij Kosova nga 10 ndeshje mund ta marrë 1 ose 2 fitore.
“Nëse do të fitojmë kundër Kroacisë do të them menjëherë pas lojës se ajo është e rastësishme. Prej 10 ndeshjeve, 1 apo 2 herë mund ta mposhtim Kroacinë, pasi dihet se kroatët kanë një nivel superior”, ka thënë Bunjaki, raporton Koha.net.
Megjithatë, Bunjaki vlerëson se përballja ndaj Kroacisë vjen në një moment të mirë, pasi ky është fillimi i përfaqësueses së Kosovës dhe entuziazmi është i mirë.
“Ndeshja ndaj Kroacisë vjen në një moment të mirë. Pasi ne jemi në fillim të rrugëtimit si kombëtare dhe presioni është më i lartë për kroatët. E dimë lëvizjet e Kroacisë dhe Ukrainën, pasi i kemi analizuar.
Mënyra e lojës së Kroacisë nuk ndryshon, kualiteti i tyre është shumë i lartë, ne duhet të jemi shumë të koncentruar. Por, në futboll ndonjëherë mjafton që të keni një rast dhe atë ta shfrytëzoni”, ka thënë trajneri i Kosovës.
Sipas tij kundërsulmet dhe ndërprerjet janë ato që duhet t’i shfrytëzojë Kosova ndaj kundërshtarëve të fortë.
“Kundërsulmet dhe ndërprerjet janë ato që sjellin rezultate, ne do të mundohemi t’i shfrytëzojmë këto raste, por ndonjëherë mund të mos realizohen. Do të mundohemi të marrim rezultate sa më të mira ndaj këtyre kundërshtarëve superiorë”, ka thënë ai. (b.an)
