Në komisionet parlamentare po shkon drejt fundit diskutimi dhe prezantimi i projekt-buxhetit të qeverisë për vitin 2024.
Pikërisht për këtë projekt-buxhet dhe më konkretisht për buxhetin e bujqësisë, paketën fiskale dhe situatën politikë në të cilën po kalon ligji i rëndësishëm flasim sot në “Debat” me ministren e Bujqësisë dhe Zhvillimit Rural, Anila Denaj dhe ekspertë të ekonomisë.
Ndër të tjera, ministrja tregoi kontributin që turizmi pati këtë verë në të ardhurat që erdhën nga prodhimet shqiptare.
Siç shpjegoi Denaj, si rezultat i turizmit këtë vit, prodhimet shqiptare kanë kontribuar një herë e gjysmë herë më shumë sesa totali i eksportit.
“64 miliardë lekë, 640 milionë dollarë erdhën nga prodhimet e brendshme dhe 570 milionë dollarë erdhën nga eksporti. I cili sigurisht vjen më i rritur se shumë vite më përpara. Pra, një here e pak më shumë sesa eksporti,” shpjegon ministrja.
Denaj shton se numri i turistëve sezonin e ardhshëm do të jetë akoma më i lartë dhe ky, siç u shpreh ajo, duhet të jetë stimul për të gjithë qytetarët që të mos e lënë tokën djerrë.
Ministrja u shpreh se sfida për vitet e ardhshme do të jetë bashkimi i operatorëve bujqësorë.
“Bashkimi i operatorëve, është një bashkim që nuk ndodh me urdhër qeverie. Por është një bashkim interesash, që nëse duhet të kuptohet mirë, kur ekziston tregu i brendshëm apo i jashtëm i eksporteve, është interesi më i madh i operatorëve…që të bashkohen.”
/a.r
