Ish Ministri i Jashtëm demokrat, deputeti Aldo Bumçi e ka cilësuar deklaratën e Ramës kundrejt kandidatit republikan Donald Trump si të pamenduar dhe të papranueshme. Bumçi tha se në asnjë vend të Europës nuk ka shtetar që komenton në të tillë formë zgjedhjet në SHBA. Demokrati theksoi deklaratën e ish Sekretares së Shtetit Hillary Clinton, ku ajo ishte në Tiranë, se Shqipëria dhe SHBA do të jenë edhe për 100 vitet e ardhshme dy shtete mike.
“Nuk ka sot asnjë kryeministër europian që të jetë i përfshirë në zgjedhjet në Amerikë… asnjë Kryeministër, President apo shtetar të jetë deklaruar për zgjedhjet… një deklaratë e pamenduar.
Kryeministri shqiptar nuk mund të thotë që nëse zgjidhjet ky apo ai kandidat, relatat mes SHBA-ve dhe Shqipërinë do të ndryshojnë.
Përpara 3 vitesh Hillary Clinton ju drejtua nga kjo foltore shqiptarëve, kur tha që kemi qenë bashkë këto 100 vite dhe do të jemi bashkë 100 vitet e ardhshme… kjo lidhje nuk është çështje emrash.”- tha Bumçi.
