Policia në Bullgari ka konfiskuar një shifër prej 13 milionë eurosh kartëmonedhash false, të cilët u gjetën të fshehura në rezervuarin Mechka, në afërsi të qytetit Purvomai, në zonën jugore të vendit. Ato ishin të gjitha në prerje 500 euroshe dhe policia po tenton që të thajë kartëmonedhat, për t’i rinumëruar ato dhe për të mësuar vlerën reale.
Në lidhje me këtë çështje, policia vendase ka arrestuar 3 persona, të akuzuar tashmë për falsifikim parash. Mediat raportojnë se përveç eurove false janë sekuestruar edhe armë zjarri. Një prej personave të arrestuar, është identifikuar si pronar i një shtypshkronje, i cili ka qenë dënuar më parë me 6 vite burgim për falsifikim parash.
Kryeprokurori Sotir Tsatsarov tha se kjo është një prej shumave më të mëdha të eurove të falsifikuara, që policia kishte hasur ndonjëherë. Po ashtu, prokurori shtoi se falsifikimi ishte bërë në mënyrë thuajse të përkryer, ndaj dhe ishte shumë e vështirë për t’u dalluar, shkruan shqip.
Më herët, Banka Qendrore Europiane vendosi të nxjerrë nga qarkullimi deri në vitin 2018 kartëmonedhën 500 euroshe, të njohur ndryshe me nofkën “Bin Laden”, për shkak të frikës se ajo ndihmon veprimtaritë kriminale, përdoret për pastrim parash, por edhe për faktin që ka shumë njerëz nëpër botë, që nuk kanë mundësi të kenë në duar një kartëmonedhë të tillë./a.k
