Mes akuzave të shumta si bashkëpunëtor i ish-Sigurimit të Shtetit, anëtari i Këshillit të Lartë të Prokurorisë, Bujar Sheshi, iu drejtua dje Prokurorisë së Tiranës, duke ngritur padi ndaj Gentiana Sulës, kryetares së Autoritetit për Informimin mbi Dokumentet e ish-Sigurimit të Shtetit.
Ka qenë denoncimi i Partisë Demokratike, që publikoi dokumentet e AIDSSHsë, ku Sheshi cilësohej si person që ka bashkëpunuar me ish-Sigurimin e Shtetit, që në adoleshencë. Një fakt të tillë, Sheshi e ka mohuar qoftë në formularët e plotësuar në funksion të kandidimit si anëtar i KLP-së, por edhe publikisht pas akuzave të ngritura. Në kërkesëpadinë e dorëzuar paraditen e djeshme në Prokurorinë e Tiranës, Bujar Sheshi akuzon drejtuesen e AIDSSH-së, Gentiana Sula, për veprën penale të “Falsifikimit të dokumenteve” të kryer nga personi që ka për detyrë lëshimin e tyre si dhe të veprës penale të “Shpërdorimit të detyrës”.
PRETENDIMET
Referuar kërkesëpadisë, Sheshi kundërshton përfundimin e nxjerrë nga Autoriteti i Dosjeve, duke e konsideruar si të qëllimshëm dhe si një goditje për shkak të funksionit të tij. Ndërsa e mbështet pretendimin në tri argumente. Së pari, prokurori thotë se në vendimin e AIDSSH-së nuk përputhen gjeneralitetet, duke nisur nga mbiemri që është Shesha, tek emri i babait dhe më pas edhe data e ditëlindjes.
Së dyti, argumenton Sheshi në padi, edhe për personin që i referohet Autoriteti i Dosjeve, nuk plotësohen kushtet e parashikuara në ligj që ai të konsiderohet bashkëpunëtor i ishSigurimit të Shtetit. Kjo, pasi nuk ka një historik të veprimtarisë së tij. “Pra, të quhesh bashkëpunëtor në kuptim të ligjit, duhet të kesh dhënë informacione në mënyrë aktiv për veprat penale të parashikuara në ligjin 7514 datë 30.09.1991. Nëse ky kusht nuk plotësohet, nuk mund të quhesh bashkëpunëtor i ish-Sigurimit të Shtetit, në kuptim të këtij ligji dhe për këtë arsye nuk mund të jepet informacion. Por pavarësisht këtij fakti, pra, pavarësisht se nuk ka të dhëna që personi me gjeneralitet e përmendura në pjesën arsyetuese, të ketë qenë aktiv, përsëri shënohet se ai është bashkëpunëtor”, shkruan prokurori në padi. Së treti, Bujar Sheshi shkruan se në vitin 1997, në cilësinë e drejtuesit të Prokurorisë së Tiranës, KLD ka nxjerrë për të certifikatën e pastërtisë së figurës.
SHPËRDORIMI I DETYRËS
Anëtari i Këshillit të Lartë të Prokurorisë ka ngritur edhe dy probleme në padi, të cilat i konsideron si shpërdorim detyre. Së pari, ai pretendon se Autoriteti i Dosjeve ka shkelur ligjin me publikimin e të dhënave të një personi, i cili ka qenë nën moshën 18 vjeç. Sheshi hedh akuza të drejtpërdrejta ndaj drejtueses së këtij institucioni, duke thënë se as pengesat ligjore nuk e kanë penguar atë. “Por edhe këto kërkesa të ligjit nuk e detyrojnë kryetaren e AIDSSH të ndalet në paligjshmërinë e saj”, shkruan Bujar Sheshi. Së dyti, ai ka ngritur pretendimin se vonesa e kthimit të përgjigjes nga institucioni është në kundërshtim me ligjin në fuqi. “Përgjigjja i është kthyer Prokurores së Përgjithshme me shumë vonesë, pas tre muajve. Nga faktet e përmendura në pjesën përshkruese të vendimit rezulton se nga data 31.10.2018 deri në datën 10.01.2019, pra, rreth dy muaj e 10 ditë, nuk është kryer asnjë veprim. Rregullorja për organizimin dhe funksionimin e AIDSSH-së, miratuar me vendimin 21 datë 09.05.2017 (neni 48) si dhe ligji 45/2015, detyrojnë punonjësit e këtij autoriteti, nën drejtimin dhe përgjegjësinë e kryetares së këtij institucioni, që të veprojnë menjëherë në dhënien e informacionit të kërkuar apo kthimin e përgjigjes. Fakti që kërkesa është zvarritur kaq gjatë, në ndryshim nga raste të ngjashme, tregon tendencën dhe qëllimin e kundërligjshëm në rastin konkret”, argumenton Sheshi.
Sheshi: 7 provat kundër Autoritetit të Dosjeve
Anëtari i KLP-së, Bujar Sheshit, në padi shkruan se burimet e provave ku bazohet kallëzimi, si dhe provat që kërkon të merren në kuadër të hetimeve të kallëzimit janë: Vendimi nr. 12, datë 22.01.2019, Autoriteti për Informimin mbi Dokumentet e ish-Sigurimit të Shtetit (AIDSSH); Dekretin nr. 5139 datë 30.01.1974, të Presidiumit të Kuvendit Popullor të Republikës së Shqipërisë, Hetuesia është unifikuar dhe është përqendruar pranë Ministrisë së Brendshme; Të këqyret dhe të administrohet kopje e njësuar me origjinalin e Kartelës model 2, nr. 8023 që përmendet në vendim. Të sekuestrohet menjëherë praktika e plotë që ka lidhje me trajtimin e kërkesës të dërguar pranë AIDSSH me shkresën me nr.2373 datë 26.10.2018 të Prokurores së Përgjithshme. Të sekuestrohet regjistri elektronik. Të këqyren librat e protokollit si dhe çdo akt i brendshëm i përpiluar në kuadër të trajtimit të kësaj kërkese. Të merren prova të tjera të diktuara nga dinamika e hetimit./panorama
/a.meta
