Presidenti i Republikës Bujar Nishani ka lëshuar një deklaratë të fortë ditën e djeshme në studion e emisionit “Opinion” ku tha se individë brenda institucioneve shtetërore janë angazhuar për të hetuar jetën e tij private.
I pyetur se mos dyshonte se pas kësaj qëndronte kryeministri Rama, Presidenti e mohoi këtë dyshim por shtoi se nuk ia kishte shprehur këtë shqetësim as kryeprokurorit Adriatik Llalla.
Dhe kjo për shkak të mosbesimit në sistemin e drejtësisë.
“Kanë angazhuar institucione shtëtërore për të hetuar jetën private të presidentit të Republikës. Jeta ime private ëshjtë qelibar, unë e kthej kokën pas më shumë krenari. Të gjithë këta individë që janë përfshirë në këtë çështje kanë bërë një gabim fatal. Ka dëshmi, ka prova dhe drejtësia herët a vonë do të veprojë” u shpreh Nishani.
Më tej Nishani u ndal në raportet e tij me kryeministrin Rama, ku ky i fundit sipas kreut të shtetit e ka trajtuar si armik. Presidenti iu përgjigj edhe akuzave se kur ishte ministër i Brendshëm kishte rekorde të ulëta në luftën kundër trafikut dhe bandave të drogës.
“Kur kam qenë unë ministër bandat e dinë mirë se me çfarë janë përballur. Tani harta e kanabisit është zgjeruar shumë” deklaroi Nishani.
