Gigi Buffon respektohej që më parë në Francë, por mbrëmë ka fituar statusin e një superylli apo heroi kombëtar, teksa ka “shpëtuar Marsejezën”, siç e cilëson e përditshmja Le Parisien.
“Një lider është i aftë të imponojë autoritetin e tij brenda një sekonde. Në momentin e himneve, dhe paksa mes befasisë së përgjithshme, nga shkallët e stadiumit San Nicola nisën fishkëllimat që në notat e parë të Marsejezës. Pas shtangies fillestare, kapiteni gjigant i skuadrës së kaltër vendos ta ndalë fyerjen”, shkruan Le Parisien.
“Mishërim klasi”, është komenti i televizioni të lajmeve BFM. “Përveçse është një nga portierët më të mëdhenj të historisë, Gianluigi Buffon, me karizmën e tij, e shtrin influencën përtej terrenit të lojës. Në notat e para të Marsejezës nisin fishkëllimat në stadiumin e Barit. Reagim i menjëhershëm i kapitetit të kaltër, i ndjekur nga shokët, të cilët ngrenë duart duke nxitur publikun të duartrokasë. Fishkëllimat kthehen në duartrokitje. Një tjetër mrekulli firmosur nga Buffon. Pak më vonë, mori mikrofonin dhe u bëri homazh viktimave të tërmetit. Në moshën 38 vjeç, Buffon konfirmon se është shumë më tepër se një futbollist”.
L’Equipe publikon reagimin e presidentit të FIFA-s, Gianni Infantino, i cili falënderoi portierin që bëri të heshtnin fishkëllimat. “Ishte një fitore e bukur e kulturës dhe qytetërimit kundër injorancës, komplimente Buffonit, një shembull për të gjithë”.
GdS/d.i.
