Banka e Shqipërisë bën të ditur se, treguesi i numrit të të punësuarve në ekonomi përshpejtoi ritmet e rritjes vjetore gjatë tremujorit të parë 2016, në 5.2% nga 3.6% që ishte një tremujor më parë.
Sipas BSH-së, rritja e punësimit në aktivitetet e shërbimeve të tregut dhe të industrisë përpunuese llogaritet të ketë mbështetur në masën më të madhe gjallërimin e punësimit në ekonomi.
Ecuria pozitive e punësimit, sipas BSH-së, reflekton jo vetëm politikat nxitëse që ka ndermarrë qeveria për riorganizimin e punës profesionale (shkallat dhe kurset), por ndikim tjetër është edhe proçesi i formalizimit të ekonomisë, nisur në tremujorin e tretë të vitit 2015.
Nga analiza e të dhënave zyrtare të tregut të punës, vihet re rritja e lartë e numrit të të punësuarve në sektorin privat jobujqësor. Punësimi në këtë sektor regjistroi rritje vjetore me 23.0% në tremujorin e parë të vitit 2016, pas rritjes me 21.9% dhe 21.8% gjatë tremujorëve të tretë dhe të katërt të vitit 2015.
