Banka e Shqipërisë prezantoi të premten raportin tremujor të politikës monetare, ku bëri të ditur të dhënat për ecurinë ekonomike në muajt e fundit të vitit që lamë pas dhe pritshmëritë për këtë vit.
Sipas Bankës së Shqipërisë, vlerësimet paraprake tregojnë se prirjet pozitive në aktivitetin ekonomik do të vijojnë edhe gjatë vitit 2017. Inflacioni parashikohet të rritet në 2.3% për vitin 2017 dhe t’i afrohet nivelit ekuilibër prej 3.0% gjatë vitit 2018.
“Në vlerësimin tonë, kushtet monetare janë të përshtatshme për të mbështetur aktivitetin ekonomik dhe rritjen e inflacionit. Politika monetare do të vazhdojë të mbetet stimuluese, por intensiteti i stimulit monetar do të përshtatet me dinamikën dhe shpejtësinë e kthimit të ekonomisë në ekuilibër”, thuhet në raport.
Banka e Shqipërisë, po ashtu, pret një përmirësim të mëtejshëm të kreditimit gjatë vitit 2017. Këto pritje, sipas BSH-së, mbështeten në sinjalet për një gjallërim gradual të kërkesës për kredi, si dhe në efektet pozitive në ofertë që do të sjellë realizimi i planit të masave për reduktimin e kredive me probleme.
Sa i përket çmimeve të banesave, sipas BSH-së, gjatë vitit 2016, çmimi i banesave u rrit me 4.6% në terma mesatarë vjetorë. Pas pesë vitesh rënie, çmimet e banesave në kryeqytetet kanë filluar të rriten sërish. Sipas Bankës së Shqipërisë, kërkesa për apartamente duket se është rigjallëruar, e mbështetur nga forcimi i rritjes ekonomike dhe ai i të ardhurave familjare, çka ka rikthyer trendin rritës të çmimeve për banesat. /a.m.
