Vlera e kredive të fshira nga bilancet e bankave rezultoi 8 miliardë lekë, duke sjellë rënien e kredisë me probleme në nivelin 20.03% në muajin qesrhor, sipas të dhënave të Bankës së Shqipërisë.
Vlera e kredisë pa shpresë arkëtimi në bilancet e bankave u ul me rreth 11 për qind. Në vlerë absolute, huatë pa shpresë arkëtimi kanë zbritur në 407 milionë euro, nga 473 milionë euro në dhjetor 2014.
Fakti që këto kredi janë fshirë nga bilanci nuk do të thotë që janë falur, ato përsëri vazhdojnë të jenë në ndjekje. Ato nuk rezultojnë në bilance, por gjithsesi janë në pasqyrat financiare të bankave. “Duhet të jemi të qartë për këtë, që të mos japim mesazhin e gabuar. Këto kredi trajtohen njëlloj si të gjitha kreditë e tjera me vonesë”, shprehen ekspertët në Bankën e Shqipërisë.
Ndërkohë, përveç pastrimit të bilanceve Banka rradhit edhe dy faktorë të tjerë që kanë ndikuar pozitivisht. Së pari, rritja e tepricës së kredisë në masën 2.4 % në terma vjetorë, ndikon në raportin e kredive me probleme, pasi flasim për një raport të shprehur në përqindje.
Së dyti, performanca e vetë portofolave të kredisë ka qenë pozitive në të gjithë segmentet e biznesit, pasi ka shlyerje dhe përmirësim të disa kredive, por dhe ristrukturim të tyre nga ana e bankave. Kjo tendencë konfirmohet dhe nga statistikat, që tregojnë se është rritur pesha e huave standarde (deri në 30 ditë vonesë) nga 69.5% në dhjetor në 73.5% në qershor 2015.
Bankat janë përqendruar ndjeshëm në menaxhimin e portofoleve të tyre me probleme, ndërsa po shiten dhe huatë e pakthyera në afat. Një prej tyre është kredia e City Park, që Tirana bank ia ka shitur një institucioni të huaj në gjysmën e parë të 2015-s, duke e hequr qafe nga protofoli i saj.
Sipas statistikave të Bankës së Shqipërisë në fund të tremujorit të dytë 2015, huatë e humbura (ato që janë pa shpresë arkëtimi) zbritën në 10.32% të totalit të kredisë, nga 11.83, që ishin në fund të 2014-s.a
Monitor
