Kryeministri Rama po merr pjesë në samitin e Bashkimit Europian dhe vendeve të Europës Juglindore në lidhje me problemin e emigrantëve në BE. Para nisjes së këtij samiti, Rama tha se edhe Shqipëria ka dhe do të ketë rolin e saj në zgjidhjen e kësaj krize.
“Shqipëria nuk është e prekur ende. Besohet se me ardhjen e dimrit, ekziston mundësia për një rrugë të re të devijuar drejt Shqipërisë. Por gjithsesi, arsyeja se pse ne jemi këtu ka të bëjë me domosdoshmërinë për tu koordinuar në nivel rajonal dhe europian. Padyshim, edhe Shqipëria ka rolin e saj në këtë moment kaq delikat dhe kaq të rëndësishëm për atë që jemi dhe për atë që do të jemi nesër të gjithë së bashku, si europianë”, u shpreh Rama.
Në minisamitin e organizuar nga Presidenti i Komisionit Europian Jean-Claude Juncker dhe Kancelarja e Gjermanisë Angela Merkel, marrin pjesë edhe presidenti i Parlamentit Evropian, Martin Schulz si dhe komisioneri i Kombeve të Bashkuara për Refugjatët dhe përfaqësuesit e agjencisë Frontex dhe Zyrës Mbështetëse Europiane për Azilin, përfshi këtu edhe përfaqësitë e shteteve si Austria, Serbia, Maqedonia, Greqia etj.
