Ish kryeministri Berisha postoi sot në FB një “denoncim” që sipas tij i ka ardhur nga personi E.H. për ambasadoren e Shqipërisë në Shtetet e Bashkuara të Amerikës Fabiola Luli Faber.
Pasi shkruan se Luli “është mbesa e Sul Bushatit, me lidhje fisnore me Ditmir Bushatin” Berisha citon mesazhin që i është dërguar nga E.H.-ja:
“Pasi kishte kërkuar vetë një takim me një grup intelektualësh dhe studentësh në Detroit, Michigan i bojkoton këta të fundit dhe nuk paraqitet në takim. Axhenda e saj e përgatitur nga disa individë me precedentë penalë në SHBA e drejton ambasadoren për darkë tek kolegu i tyre i sapo dalë nga burgu federal ne SHBA. Ambasadorja mendjeshkurtër bojkoton studentët dhe intelektualët për të vizituar dhe darkuar me kriminelët… Kryetari i Dhomës se Tregtisë dhe Përfaqësuesi i Shoqatës Kulturore Shqiptare ne Detroit Z D.B. disponon të gjithë korrespondencën të cilën mund tua dërgojmë. Respekt, E. H.”
Fabiola Luli Faber ka reaguar po sot.
Sipas saj, gjatë ditës që qytetari pretendon se ka refuzuar takimin ishte në Uashington dhe kishte një takim me konsullin e nderit Ekrem Bardha.
“Agjenda e vizitës në Detroit ishte vetëm këto të dyja, takimi me zotin Ekrem Bardha, dhe 25-vjetori Ligës Shqiptaro-Amerikane. Çdo përpjekje tjetër ishte manipulim dhe presion per axhenden”, sqaroi ajo në një reagim për gazetën Tema.
Ambasadorja sqaron se “personi që i shkruan letrën Sali Berishës është Eduart Aliko, ish-zyrtar i tij dikur doganier e më pas drejtues i Gjendjes Civile me origjinë nga Lazarati”.
“Ato që bënë zhurmë dhe kanë përgatitur dhe një ambient mbledhjesh, në të ashtuquajturin Imperial House, janë Dede Beleshi, dhe Ndue Ftoni persona me probleme me drejtësinë amerikane. Pra e vërteta është në anën e kundërt. Njerëzit e Berishës që kishin sajuar një takim për të prodhuar lajm, janë ata që kanë probleme me drejtësinë”, – thotë ambasadorja
