Për liderin e opozitës, Lulzim Basha, mund të ekzistojë një plan për eliminimin e tij fizik. Të paktën kështu qarkulloi një lajm ditën e enjte në media, se vrasja e kreut të PD ishte përgatitur jashtë vendit.
Lajmin nuk e mohuan krerët e lartë të shtetit, por as vetë kryedemokrati Lulzim Basha, i cili u shpreh se çdo kusht mund të jetë i kërcënuar.
Eksponentë të politikës shqiptare kanë komentuar kërcënimin e Lulzim Bashës, kujt mund t’i interesojë “eliminimi” i tij dhe sa e mundur është që të ndodhë një skenar i tillë. Ish-ministri i Mbrojtjes, Sabit Brokaj, në një prononcim për gazetën “Sot”, shprehet se një ngjarje e tillë është e mundur, pasi Shqipëria ka precedentë të mëparshëm.
Brokaj u shpreh se vrasja e Bashës do t’u interesonte atyre që duan të bllokojnë reformën në drejtësi, duke sjellë ndër mend vrasjen e Azem Hajdarit dhe katër vrasjet në Durrës dhe Shkodër, që u shfrytëzuan për rrëzimin e pushtetit të kundërshtarit dhe shpalljen e zgjedhjeve të parakohshme.
“Njerëzit nuk vriten për atë se çfarë përfaqësojnë vetë, por për efektet që sjell vrasja e tyre. Dhe Shqipëria e ka përvojën. Në ’91 u vranë katër vetë në Durrës dhe në Shkodër, në mënyrë që kundërshtarët të dorëzonin pushtetin dhe të shpalleshin zgjedhjet e parakohshme.
Në ’98 u vra Azem Hajdari; vendi u destabilizua, u zunë zyrat e Kryeministrisë dhe Parlamentit, etj. Pra është e vërtetë se Basha nuk përbën ndonjë personalitet, por efektet destabilizuese të atyre që e duan destabilizimin, që nuk duan reformën në drejtësi, sigurisht probabilitet gjithmonë ka. Shqipëria e ka një farë përvoje”, u shpreh Brokaj.
Nëse lajmi do të ishte i vërtetë, Brokaj tha se “eliminimi” i Bashës do të përdorej për të bërë fajtore qeverinë aktuale. “Cilido që kërkon të destabilizojë reformën në drejtësi, reformat, vetingun, është e mundshme që të ndodhë një gjë e tillë. Kjo mund të ndodhë jo për Bashën si personalitet, por për ta përdorur “vrasjen” e tij në dëm të të gjitha reformave të ndërmarra nga kjo qeveri”, tha Brokaj.
Ish-ministri i Mbrojtjes, Sabit Brokaj,nuk përjashton mundësinë që Basha të ketë fatin e Azem Hajdarit. Pra nuk bëhet fjalë për Bashën si personalitet, por për efektin që do të sillte “vrasja” e tij për destabilizimin e vendit.
Atentati thuhet se ishte organizuar jashtë Shqipërisë dhe për ekzekutimin e tij ishin kontraktuar vrasës me pagesë, të njohur si persona të rrezikshëm, të cilët thuhet se ishin pajtuar edhe në vitin 2011, për të organizuar një atentat ndaj një tjetër politikani të rëndësishëm në vend, për të shkaktuar trazira, për shkak të gjendjes së tensionuar politike, që po kalonte vendi edhe në atë kohë.
Për këtë qëllim, mësohet se kreu i Shërbimit Informativ Shtetëror ka zhvilluar takime me kryeministrin e vendit dhe ministrin e Brendshëm. Ai u ka vënë në dispozicion atyre të gjithë informacionin e marrë, duke përmendur edhe emra konkretë të personave të përfolur si ekzekutues të skenarit./a.m.
