“Që prej rënies së komunizmit, Shqipëria është përpjekur të ngrihet në këmbë, por pasi ka prezantuar një seri reformash të gjera, Rama tani po udhëheq bisedimet për anëtarësim në BE. Por lideri i Partisë Socialiste përballet me një betejë për të reformuar sistemin gjyqësor thellësisht të korruptuar. Si kusht për anëtarësimin në BE, secili nga 800 gjyqtarët dhe prokurorët në vend duhet të verifikohet për të shpjeguar çdo pasuri të pazakontë apo gjykimet e shkuara. Tashmë 22 gjyqtarë kanë dhënë dorëheqjen, por procesi i vettingut rrezikon të dështojë për shkak të Partisë Demokratike në opozitë, që ka lidhje të ngushta me gjyqësorin”, shkruan “The Telegraph”, që ka intervistuar edhe kryeministrin Edi Rama.
“Ky ka qenë një shqetësim i madh për opozitën, pasi kanë qenë për një kohë të gjatë në pushtet dhe kanë arsyet e tyre për të pasur frikë nga një sistem i pastër dhe i mirë gjyqësor,” thotë Rama.
Ky i fundit ka folur edhe për rrezikun e ndikimit rus në Ballkan.
“Ballkani është në rrezikun e rrëshqitjes nën influencën ruse nëse administrata Trump e injoron rajonin.
Rusia ka qenë e interesuar për të përhapur ndikimin e saj dhe ka bërë shumë në këtë rajon”, thotë Rama, sipas të cilit, “për SHBA, ky rajon ka rëndësi të madhe strategjike dhe SHBA janë shumë të rëndësishme për ne”.
ma.me
