Aleanca e rrënuar ka fituar. Ajo preferoi të kaluarën përballë të ardhmes, kujtimet e ëndrrave, iluzionet, përballë interesit të përbashkët dhe logjikës normale. Ata që e nxorrën Britaninë nga BE janë pjesë e “Englanders”, krahinat periferike të vendit, qytetarët më pak të arsimuar, njerëzit nostalgjike të të gjitha moshave.
Brexit duket, para së gjithash, si stërkëmbëshi i një brezi ndaj një tjetri. Në mesin e Britanikëve mbi 65 vjeç, vetëm 40% votuan për të qëndruar në Bashkimin Evropian. Në mesin e votuesve deri në 34 vjeç, përqindja rritet në 62%. Tek të rinjtë në mes 18 dhe 24 vjeç, ata që janë në favor të Evropë janë 73%. Gjyshërit kanë vendosur kësisoj të ardhmen e nipërve.
Të jetosh me të shkuarën e afërt, është tundimi i vendeve në vështirësi.Ka diçka qetësuese tek ata që janë mësuar të ndjekin vetëm zakonet, natyrisht. Por, duke hequr dorë nga projektet e mëdha, në favor të ngushëllimit të vogël, kjo është pa kuptim. Evropa është – ishte – një projekt i madh, edhe për Mbretërinë e Bashkuar. Anglezët i rinj, ndoshta, nuk kanë qenë në gjendje t’i bindin gjeneratat paraardhëse. Sigurisht ata nuk kanë qenë në gjendje të përçojnë më shumë entusiazëm në shoqërinë britanike. Ata nuk ishin me fat: ata gjetën në rrugën e tyre liderë politikë të ngathët (konservatorin David Cameron); ose udhëheqës të papërgjegjshëm (laburisti Jeremy Corbyn, protagonist i një fushate skandaloze e joefikase), ose u përballën me liderë cinikë (si Boris Johnson, i cili ëndërron të bëhet Churchill, por ka më shumë gjasa të kthehet në Trump).
Çfarë do t’i ndodhë tani këtij brezi të ri? Po të rinjve të tjerë europianë që jetojnë në Londër, si do t’u vejë halli? Për të kuptuar mundësitë e tyre për të studiuar, punuar dhe lëvizur – do të duhet të informohen se çfarë kushtesh do vendosë këtej e tutje qeveria britanike.
Nëse dëmi nuk është ende i matshëm, pasiguria dhe ankthi janë tashmë të sigurta. Të rinjtë në këtë vend janë mësuar të udhëtojnë, jetojnë dhe punojnë kudo, në sajë të gjuhës angleze. Për ta, nga sot çdo gjë do të bëhet më e vështirë, nëse jo e pamundur (mendoni për shembull programin Erasmus).
Marrë me shkurtime nga La Repubblica
