Shtetasi Enton Nikaj ka gjetur vdekjen dhe një tjetër ka mbetur i plagosur pas të shtënave me armë zjarri në zonën e Dajtit në Tiranë.
Ngjarja e rëndë ka ndodhur rreth mesditës së të mërkurës në një restorant në fshatin Linzë, të komunës Dajt.
Nga breshëria e plumbave është plagosur një tjetër person, shtetasi Ismet Gaxherri, pronar i lokalit ku ndodhi ngjarja.
Policia ka mbërritur në vendin e ngjarjes dhe po heton rreth ngjarjes për të zbardhur dinamikën dhe autorësinë e saj. Paraprakisht besohet se ngjarja e rëndë ka ndodhur për motive banale.
Uniformat blu kanë identifikuar autorin e krimit, një shtetas me precedentë kriminal dhe po punojnë për arrestimin e tij.
Viktima kishte vetëm pak ditë kishte dalë nga burgu, ku vuajti një dënim për “tentativë vrasjeje”. Nikaj njihet edhe si një prej pjesëtarëve të bandës së Gazmend Brrakës, i njohur me nofkën “Gaxhai”.
Hetimet janë përqendruar në dy pista, atë të një konflikti banal dhe e shkuara me precedent penal e viktimës.
ja deklarata e Policisë për ngjarjen
Tiranë, më 11 Nëntor 2015
Njoftim për Shtyp
Më datë 11.11.2015, në orën 14:10 minuta në Sallën Operative ka mbërritur një telefonate se, në fshatin e quajtur Mëzes ,në rrugën e Dajtit, në Restaurant me mbishkrimin “MURAGA”, ka persona te qëlluar me armë zjarri.
Menjëherë në vendngjarje ka shkuar grupi hetimor , si edhe Prokurori i gatshëm.
Në vendngjarje ,nga veprimet e para hetimore ka rezultuar se shtetasi Enton Nikaj vjeç 30, është qëlluar me arme zjarri pistolete i cili me pas ka ndërruar jetë si edhe ka mbetur i plagosur shtetasi me iniciale I.Gaxheri(pronar i restaurantit) i cili dyshohet të jetë goditur me qytën e pistoletës.
- Viktima, Etnon Nikaj, 30 vjeç, banues në Tiranë, me precedentë të mëparshëm penal
- I plagosur, shtetasi me iniciale I.Gaxheri, banues në Tiranë me precendentë të mëparshëm penal.
Pas këtij veprimi autoret e dyshuar jane larguar nga ambjentet e restaurantit me një automjet të dhëna të tjera nuk mund të jepen për arsye hetimi.
Gjatë kqyrjes të vendit të ngjarjes janë gjetur, fiksuar dhe sekuestruar në cilësinë e provës materiale 1 copë gëzhoje pistolete, si edhe është bërë sekuestrimi i pamjeve filmike të kamerave që dispononte ky restaurant.
Gjithashtu nga ana e Policisë janë ngritur grupe të shumta kontrolli ku janë kryer një sërë kontrolle banesash dhe po punohet për zbardhjen e dokumentimin e plotë të ngjarjes dhe kapjen e autorit/ve të dyshuar të kësaj ngjarje.
