Deputetja e Partisë Demokratike Majlinda Bregu mbetet e vendosur për t’i shkuar deri në fund, miratimit të një ligji që do të mund të kontrollojë komentet ofenduese dhe denigruese në portalet online.
E kontaktuar nga Javanews.al, deputetja Bregu sqaroi projektligjin e dorëzuar në Kuvend prej saj dhe siç u shpreh ajo që synon të mos publikohen ose të fshihen nga portalet online komentet denigruese që shkelin etikën.
“Projektligji është një iniciativë për të fshirë komentet që janë me natyrë denigruese, shkelin etikën, e kalojnë kriticizmin dhe që nuk kanë aspak lidhje me lajmin. Bëhet fjalë për ato komente që e kalojnë dozën normale të kriticizmit. Unë në fakt këtë e nisa për gratë dhe për ofendimet ndaj tyre në komentet online, për ta shtrirë më pas në të gjithë hapësirën online. Kjo në fakt nuk ka të bëjë me lajmin, por për të shmangur komentet denigruese të integritetit të personave. Ky është një ligj i domosdoshëm, pasi portalet online janë një fenomen i ri.” tha Bregu
Arsye tjetër sipas saj për domosdoshmërinë e një ligji të tillë për mediat online, buron edhe nga fakti se mbi mediat online nuk ka autoritet që të kontrollojë apo mbajë nën vazhgim. Lidhur me këtë aspekt ajo ka propozuar një ndryshim në Kodin Civil ose edhe një ligj të veçantë.
Për të diskutuar mbi këtë fenomen, që sipas saj është mjaft sensitiv, më datë 24 prill do të mbahet edhe një tryezë diskutimime të ftuar përfaqësues të medias dhe të shoqërisë civile.
“Arsyeja e dytë është se nuk ka një autoritet që të kontrollojë mediat online. Kemi AMA-n e cila faktikisht ka nën vëzhgim mediat audiovizuale por jo ato online. Ligji ka kaluar në Komision. Unë në fakt nuk e prisja por projektligji ka ngjallur mjaft debate. Në datën 24 në fakt do të ketë një tryezë ku të ftuar do të jenë përfaqësues të medias, shoqërisë civile si dhe pedagogë e profesorë. Unë kam propozuar ndryshim në kodin civil. Në fakt ky është një ligj sensitiv, një pjesë duan ta përkufizojnë si ndërhyrje në lirinë e medias por që në fakt nuk është aspak kështu. Do të ketë një diskutim, ndoshta mund të ketë edhe një ligj të veccantë, duke rregulluar përgjejgësitë dhe duke ia dhënë ato për shembull AKEP si dhe detyrimet që duhet të kenë portalet. Në këtë mënyrë është përgjegjësi e administratorit të portalit që të kujdeset për komentet dhe çdo informacion me karakter ofendues dhe denigrues.” u shpreh Bregu.
Projektligji i propozuar nga deputetja demokrate ka kaluar në Komisionin Parlamentar, ndërsa ka ngjallur mjaft debate.
Redaksia Online
(Javanews.al)
