Me dy golat e shënuar ndaj Meksikës të hënën, 2 korrik 2018, Seleçao është ekipi kombëtar që ka shënuar më shumë gola në historinë e Kupave të Botës, duke kaluar kështu Gjermaninë.
Brazili u bë ekipi, i cili përveçse ka fituar më shumë Kupa Bote se të gjitha përfaqësueset e tjera (5 në total, përkundër 4 të Gjermanisë dhe Italisë), ka shënuar më shumë gola në historinë e turneut më prestigjioz.
Ai kryeson me një total prej 228 golash, 2 më shumë se Gjermania (226), e cila u eleminua që në fazën e grupeve. Ekipet e tjera janë shumë larg tyre: Argjentina e treta me 137 rrjeta, Italia e katërta me 128 realizime.
NEYMAR: “Ishte e vështirë, por ne ishim më mirë”
Kalimi i Brazilit në çerekfinale ka shtuar gëzimin e Neymar. “Ne duhet të përgëzojmë të gjithë ekipin. Kishte momente gjatë ndeshjes ku kemi vuajtur, por përpara kemi pasur një Meksikë të vështirë për t’u përballur, pasi kishte forcë dhe cilësi. Por ne treguam se kemi më shumë”.
Këto qenë fjalët e Neymar pas ndeshjes, të cilën e mbylli me një gol dhe një pas për gol. /b.d
