Janë holandezë, por mëngjesi i tyre nis çdo ditë me një kafe turke si dy shqiptarë të vërtetë. Pothuajse të gjithë mënyrën e jetesës ia kanë përshtatur vendit, madje edhe emrat e tyre.
Erwin Schoonmade sot quhet Ervin ndërsa Adalgisa Christina Veronica njihet me emrin Vera.
Prej afro dy vitesh Vera dhe Ervini jetojnë në fshatin Perondi në Bashkinë Kuçovë. Kanë hedhur pas krahëve ditët e ngarkuara në Hollandë për të jetuar në një banesë që të kthen rreth 50 vite pas.
Aventura e tyre drejt Shqipërisë nisi në vitin 2022. Pasi udhëtuan në zona të ndryshme të vendit, vendosën të niseshin drejt fshatrave të Beratit. Udhërrëfyes kishin hartat dhe këshillat e njerëzve që takonin. Përshtypja e parë që iu la shtëpia e vjetër ku jetojnë edhe sot ishte mbresëlënëse.
Ajo iu dhuroi atë që po kërkonin prej muajsh, gjetjen e kohës për veten dhe njëri-tjetrin në mes të natyrës së pa cënuar nga dora e njeriut.
Gjysëm viti më pas ata morën vendimin për t’u rikther e jetuar në këtë fshat të njohur pothuajse vetëm nga vendalinjtë.
Të dashuruar me jetën e re, Vera dhe Ervini vendosën që banesën e tyre modeste ta shndërrojnë në vend mikpritës për të huajt që duan të njihen me Shqipërinë.
Në Blogun e tyre përveç shpjegimeve mbi itinerarin e rrugëtimit drejt të panjohurës, ata detajojnë arsyet pse duhet vizituar ky vend.
“Çdo stinë është e bukur në Shqipëri! Dëshironi të largoheni për një kohë?
Kjo është e mundur, këtu me ne në mes të natyrës.
Për çfarëdo arsye. Jeni çift dhe dëshironi të kaloni më shumë kohë në natyrë së bashku me një mënyrë jetese më elementare?
Do të dëshironit të largoheni nga përditshmëria dhe të përjetoni një botë krejtësisht të ndryshme, rreth 50/60 vjet më parë në kohë?
Atëherë ejani dhe bashkohuni me ne në Shqipërinë e bukur.”
Nga vizitorë, Vera dhe Ervini sot janë janë banorë të fshatit që ndodhet vetëm 20 min larg Beratit. Madje zgjodhën emra shqiptarë që fqinjtë tua shqiptojnë lehtësisht. Shtëpia ku banojnë iu është lënë falas nga miqtë e tyre shqiptarë.
Me dëshirën për të qëndruar sa më gjatë në Perondi, Vera dhe Ervini kanë marrë edhe një godinë të vjetër banimi me qira për ta bërë pjesë të biznesit turistik.
Ervini po bën i bën vetë të gjitha, nga ndërtimi deri tek punimet e vogla artizanale me drurë të ndryshëm. Duan që gjithçka të ketë lidhje me natyrën.
Gjatë gjithë bisedës me ta, kupton që çifti nga Hollanda ka gjetur veten në këtë fshat të Kuçovës.
Ata janë të lumtur të mirëpresin edhe fëmijët e tyre. Ndërkohë, shoqërues kanë edhe dy qen, dikur të braktisur. Gjithçka përjetojnë është e dukshme në këtë panoramë ku mbizotëron dashuria dhe qetësia.
