Menjëherë pasi kreu i Kuvendit Ilir Meta i kërkoi shpjegime, Kreu i Komisionit të Sigurisë Spartak Brarho ka reaguar në lidhje me vizitën e tij në spitalin ku qëndron i shtruar deputeti i akuzuar Mark Frroku.
Përmes një komunikate për mediat, Braho sqaron se ka qenë në spital për arsye të tij shëndetësore, duke hedhur poshtë dyshimet e ngritura në media për një takim të mundshëm të tij me deputetin Frroku.
Duke i cilësuar qesharake aludimet se arsyeja e vizitës së tij në këtë spital lidhej me Frrokun, Braho ka theksuar se përkundrazi ai nuk ka pasur dijeni për ndodhjen e Frrokut në këtë spital por vetëm kur ka dalë nga dera.
Kreu i Komisionit të Sigurisë fton mediat të shohin kamerat e sigurisë, duke u shprehur se çdo pretendim i kundërt është pjesë e propagandës së Partisë Demokratike dhe se nuk ka aspak lidhje me të vërtetën.
Më poshtë deklarata e plotë për media e Spartak Brahos:
Jam befasuar dhe kam ndjerë keqardhje e neveri që ndonjë media vazhdon të mbetet përhapëse e lajmeve dizinformuese, mision ky që jo vetëm nuk i ka hije një televizioni, por i katandis ato në si mos më keq e në përdorim klientelist të soj e sorollopësh intrigantë e aspak profesionalë. Nuk e di dhe për llogari të kujt këto televizione transmetuan pamje dhe sekuenca filmike në qendër të të cilave vendosesha unë duke dalë nga dera kryesore e Spitalit Gjerman të kardiologjisë dhe që kjo pamje u komentua si ‘vizitë e dyshimtë e Brahos në këtë spital, pasi aty ndodhej i shtruar i akuzuari Frroku!’.
Ndonëse as nuk ia vlen të merresh me sqarimin e këtij dyshimi që hedh në eter kova e ndryshkur propagandistike për të bërë gjoja “lajm”, prania ime në këtë spital ishte tërësisht për arsye shëndetësore, e planifikuar dhe e dokumentuar ditë më parë ku kontaktova mjekun përkatës të laboratorit në katin e parë.
Kanë rast ‘investiguesit seriozë’ të shkojnë të kontrollojnë kamerat e sigurisë së spitalit të cilat regjistrojnë çdo gjë, policët përkatës në shërbim dhe të zbulojnë lajmin e saktë, që s’është lajm fare. Është e vërtetë se praninë e Frrokut në atë spital e kam marr vesh vetëm kur dola nga ambientet e spitalit dhe për çudinë time pashë që disa kamera televizive po më filmonin. Nuk iu dhashë rëndësi pasi bashkëshoqëruesi më sqaroi se prania e tyre lidhej me faktin se në ambientet e kateve të sipërme të spitalit ndodhej i shtruar Mark Frroku.
Me kaq lidhej qenia ime dhe lajmi i saktë zotërinj drejtues, pronar, gazetar të disa mediave që fabrikuat lajm kot. Kini kujdes mos i kriminalizoni televizionet shqiptare dhe veten e tuaj. Ky sugjerim s’ka të bëjë me korrigjimin e bindjeve tuaja, por me etikën, korrektesën dhe profesionalizmin shpeshherë të munguar.
Mjaft djem, investigues! Bëhuni seriozë e të ndershëm, se na sëkëlldisët kalamajt, miqtë e shokët, sikur ç’ka ndodhur e ç’keni zbuluar. Muhabet kot që i interesoi vetëm ndonjë gazete si “RD”. Mos harroni se në gjendje arresti me polic te koka është Mark Frroku e Tom Doshi. Unë isha tek dera spitalit, as në ndonjë aeroport apo hotel e në duar mbaja vetëm letra! Qesharake!”
Redaksia Online
(Javanews.al)
