Partia Demokratike deklaron se rritja e çmimit të biletës së urbanit do t’i kushtojë qytetarëve 5.5 milionë dollarë më shumë në vit. Anëtarja demokrate në Këshillin Bashkiak të Tiranës, Reila Bozdo tha sot se ‘me një akt të turpshëm dhe të pastër korruptiv, Erion Veliaj vendosi dje të rrisë çmimin e biletës për qytetarët e Tiranës’.
Deklarata e Reila Bozdos
“Kjo është një vjedhje e pastër dhe skeme korrupsioni e Erion Veliajt dhe disa bashkëpunëtorëve të tij të njohur për afera të pista korruptive në të shkuarën dhe do bashkëndahen mes Veliajt dhe bashkëpunëtorëve të tij. Qytetarët e mbajnë mend mashtruesin Veliaj se si doli vetëm 4 ditë më parë dhe premtoi se nuk do të ketë rritje të çmimit të biletës madje ai do të drejtonte vetë dhe autobusin dhe shërbimi nuk do të ndërpritej. Kjo deklaratë e Veliaj s’ka qenë gjë tjetër veçse presion ndaj shoqatave të transportit për të rritur ryshfetin në skemën konspirative dhe korruptive që ndërtuan së bashku për të zhvatur qytetarët. Veliaj mund të kishte parashikuar një pjesë të 120 milionë dollarë taksa që kërkon të mbledhë për të financuar transportin publik. Por ai zgjodhi rrugën më të shkurtër dhe më të pisët. Ai vendosi të ngrejë çmimin e biletës për ju qytetarë. Ju gënjeu pa pikë turpi. Ju mori me një dorë 5.5 milionë dollarë në vit nga xhepat tuaj dhe nga buxheti i familjeve tuaja.
Po dje me arrogancën e kartonave miratuan rritjen dhe shtimin e 30 taksave dhe tarifave. Pra 50 milionë dollarë më shumë do t’u merren duke nisur nga janari qytetarëve dhe bizneseve të Tiranës. S’ka investime, s’ka asnjë projekt për zhvillim ekonomik dhe punësim, vetëm abuzim dhe vjedhje me pasuritë dhe pronat publike. Ne nuk mund ta pranojmë këtë vjedhje, këtë hajdutëri, këtë mashtrim e korrupsion. Në emër të këshilltarëve të Partisë Demokratike ju bëj thirrje qytetarëve të Tiranës të reagojmë me të gjitha format e mosbindjes civile për të detyruar sprapsjen e këtij krimi të shëmtuar korruptim”, tha Bozdo.
