Pas stërvitjes dy ditore në Barcelonë me grupin e plotë, kombëtarja kuqezi e futbollit mbërriti mesditën e të mërkurës në Andorra, aty ku nesër në orën 20:45 luhet sfida që vlen për raundin e parafundit kualifikues në Grupin K të Kupës së Botës 2026.
Nga stadiumi “Encamp” ku do luhet ndeshja, përpara mediave dolën trajneri Sylvinho dhe kapiteni Berat Gjimshiti. Dyshja cekën rëndësinë e këtij dueli, që për tanët munud të jetë deçiziv. Një fitore e Shqipërisë në Andorra, kombinuar me humbjen e Serbisë në Angli, do bënte që Kombëtarja kuqezi zyrtarisht të ishte në play-off e Kupës së Botës 2026 si e dyta e grupit, për të kërkuar një biletë në finalet që zhvillohen verën që vjen në Amerikën e Veriut.
Sylvinho: Janë dy ndeshje të ndryshme. Trajneri i Andorrës që e njeh mirë ekipin e tij. Ka një anë mbrojtëse shumë të mirë. Nxjerr maksimumin nga lojtarët e tij. Është një ekip që pëson maksimumi 2 gola. Edhe në Tiranë ishte e vështirë, deri sa shënuam. Luajnë në çdo cep të fushës. Shpresoj që t’ia dalim të fitojmë. Në fakt po rritemi shumë si Federatë. Kur rritemi ne, të njëjtën gjë bëjnë edhe të tjerët. Kjo shihet edhe në rezultatet e arritura. Diferencat në futboll bëhen gjithnjë dhe më të vogla. Kur luan jashtë, është më e vështirë se në shtëpi. Ne kemi rezultate më të mira në shtëpi. Jemi në një situatë të mirë, nuk e kemi pasur më parë në historinë e Kombëtares. Shpresoj të kemi një rezultat të mirë ndaj Andorrës. Detyrimi për fitore, ka nisur nga ndeshja me Letoninë. Kemi një ekip të ekuilibruar. Do jetë ndeshje e vështirë. Do jetë i njëjti shpirt gare.
