Ndërsa viti 2025 po numëron ditët e fundit, atmosfera e festave ka zbritur në çdo cep të globit. Dritat shumëngjyrëshe kanë transformuar monumentet historike, sheshet qendrore dhe lagjet e thjeshta në skena mrekullie, duke sjellë njerëzit më pranë njëri-tjetrit në një ndjenjë të përbashkët shprese dhe gëzimi.
Agjencia prestigjioze Associated Press ka kuruar një galeri me fotot më pikante nga festimet e këtij viti, ku spikat edhe atmosfera në kryeqytetin shqiptar.
Tirana mes metropoleve botërore
Në këtë kolazh global, nuk mungon as Shqipëria. AP ka përzgjedhur momentin nga data 6 dhjetor 2025, ku qytetarë të shumtë u mblodhën në Sheshin “Skënderbej” për koncertin festiv dhe ceremoninë e ndezjes së dritave të pemës së madhe, duke e vendosur Tiranën në hartën e qyteteve që rrezatojnë festë.
Nga Amerika në Azi një spektakël dritash
Fotot udhëtojnë nga Londra, ku Kopshtet Kew dhe Trafalgar Square janë ndezur për Krishtlindje dhe Hanukkah, deri në Shën Petersburg të Rusisë, ku fasadat historike janë kthyer në telajo për shfaqje multimediale.
Në Shtetet e Bashkuara, atmosfera varion nga madhështia e pemës në Rockefeller Center në New York, te dekorimet unike në Shtëpinë e Bardhë me portrete Lego të presidentëve, e deri te Teksasi, ku çizmet gjigante të kaubojve janë veshur me drita festive.
Nuk mbeten pas as Parisi me pamjen ikonike të Kullës Eiffel, tregjet tradicionale në Frankfurt e Berlin, apo instalacionet moderne në Seul dhe Dakar.
Kjo galeri dëshmon se pavarësisht kulturave të ndryshme, drita mbetet simboli universal i festave të fundvitit.
