“Ata janë gjakftohtë, të trajnuar ushtarakisht me AK47 dhe kokteje molotovi që i përdorin për të vepruar në vendin tonë”, nisë rrëfimi i hulumtues i gazetarit spanjoll i botuar në gazetën spanjolle “Cadenaser”, përmes së cilit hedh dritë mbi funksionimin e bandave që ai i ndanë në mafia kosovare dhe mafia shqiptare në Spanjë.
“Por ata nuk janë vrasës serial ose psikopatë të diagnostifikuar, janë qytetarë të këtij vendi që një ditë vendosin t’i kapin armët dhe tu bashkohen mafive për t’i shpëtuar varfërisë”, rrëfen gazetari spanjoll që thotë se ka kryer 5 muaj hulumtim për këtë temë.
Gazetari dhe studiuesi Carlos Queilez, ka gjetur se perandoritë e mafias kosovaro-shqiptare, të tërhequra nga klima, ligjet e dobëta dhe burgjet e rehatshme, kanë gjetur Spanjën si territor për gjueti dhe plaçkitje.
Gazeta citon intervistën me protagonistin e tregimit që vjen nga Shqipëria për krime të vogla, që pas lirimit ka hyrë në bandën Blaquu, një mafi e fuqishme në Evropë.
“Blaqqu është një nga afro 20 bandat kosovaro-shqiptare që funksionojnë në Spanjë. Edhe pse ata drejtojnë operacionet nga Madridi ose Barcelona, degët e tyre janë të vendosura në të gjitha pjsët e gadishullit”, raporton gazeta spanjolle.
Personazhi i emëruar Sasha, identiteti i të cilit nuk është treguar, rrëfen historinë e tij, kur si adoleshent kishte ardhur në Spanjë ku ishte marrë me grabitje dhe kur këto grabitje ishin bizhuteri të shtrenjta ose para kesh kryheshin nga ai më shpesh, fitoi besimin për të drejtuar një bandë prej 20 vetash.
“Unë jam i fortë dhe brutal. Nuk kërkoj asgjë më pak e asgjë më shumë sesa një plaçkë luksoze”, ka rrëfyer ai për gazetën.
“Brutal e kam fjalën për likuidim të konkurrentëve dhe dëshmitarëve sepse gabimet paguhen me gjak”, shton ai.
Gazetari i cili thotë se ka parë edhe nga afër funksionimin e këtyre bandave, e përshkruan funksionimin e bandave shqiptare të Kosovës dhe Shqipërisë si mini-ushtri.
“Ata veprojnë madje edhe në qeli duke urdhëruar përdorimin e dhunës ekstreme. Ndër radhës e tyre janë veteranë të luftës në Kosovë apo dezertorë të ushtrisë shqiptare. Janë të pajisur ose me armë ose me dije për armët ushtarake duke i bërë ata të tmerrshëm në terren”, përshkruan gazetari.
Sipas këtij hulumtimi, këto mini ushtri mafioze të shqiptarëve në Spanjë janë të fokusuara në plaçkitjet në shtëpikë luksoze dhe kompanitë që kanë para kesh, por viteve të fundit kanë shtrirë rrënjët edhe në tregun e drogës.
Gazeta shkruan sesi 20 vite më parë, funksionimi i këtyre bandave vetëm përflitej por nuk kishte të dhëna konkrete. Sot ato janë të forta dhe në radhët e tyre kanë shumë të rinj nga Shqipëria dhe Kosova dhe të gjithë janë të pajisur me pushkë automatike.
Të dhënat nga burgjet e Spanjës flasin se 7 nga 100 të burgosur në burgjet spanjolle janë shqiptarë.
“Shifrat rriten vit pas viti. Jo vetëm pas hekurave por edhe në rrugë”, përfundon hulumtimi.
