Individët kanë shfaqur më shumë interes për të blerë letra me vlerë të qeverisë vitin e fundit, si rezultat i normave më të favorshme që ofrojnë obligacionet krahasuar me depozitat bankare.
Në të kundërt është vënë re një ulje e peshës së bankave në pjesmarrjen e tyre në financimin e borxheve të qeverisë.
Sipas të dhënave nga Ministria e Financave, në fund të shtatorit 2015 pesha e Raiffeisen Bank në borxhin e brendshëm të qeverisë arriti në 17.48 për qind nga 17.16% që ishte një vit me parë, ndërsa pesha e BKT-së arriti në 16.42% nga 16.70% që ishte një vit më parë.
Ministria e Financave referon se, gjatë, vitit 2015 ka pasur tendenca pozitive përsa i përket rritjes së diversifikimit të portofolit nga pikëpamja e mbajtësve të tij, nga ku vërehet një ri-shpërndarje e peshave ndërmjet kategorive Banka, Jo Banka dhe individë.
Kategoria Banka ka pësuar një rënie të peshës specifike, me rreth 197 pb; peshë e cila ka kaluar në favor të portofolit të kategorisë Jo Banka dhe kategorisë së individëve, përkatësisht me 57 dhe 140 pikë përqindje. Nga ana tjetër, edhe brenda së njëjtës kategori (Jo Banka) ka pasur ndryshime të peshave, nga ku vlen të përmendet rritja e peshës së mbajtur nga institucionet Financiare me 66 pikë pikë përqindje dhe rënia e peshës së instituteve Jo Financiare me 8 pikë përqindje.
Në ndryshim nga tendenca e dy viteve të fundit (2012-2014), gjatë vitit 2015 karakteristike është rritja e portofolit të individëve me 140 pikë përqindje, rritje e cila vjen kryesisht si rezultat i normave më të favorshme që ofrojnë obligacionet krahasuar me depozitat bankare.
Diversifikimi i bazës së investitorëve ndikon ndjeshëm në zhvillimin e tregut primar vendas, por mbështetja tek sistemi bankar dhe angazhimi i një pjese të konsiderueshme të aseteve të tij përbën risk për ecurinë në terma afatgjatë
Huamarrja e re në periudhën janar-shtator të vitit 2015, ka bërë që të ketë rritje në peshat e instrumenteve afatgjata duke ulur në këtë mënyrë ekspozimin e portofolit ndaj riskut të rifinancimit dhe normave të interesit.
Përsa i përket financimit neto sipas investitorëve, aktorët kryesore të cilët realizuan huamarrjen e brendshme për 9 mujorin 2015 ishin: individët me 39.63%, BKT me 25.49%, Credins me 24.54 %, RZB me 22.85%, ASD me 16.48% dhe Fondi Prestigj me 9.58%./Monitor
