Fshati turistik i Borshit po zhvillon turizmin me hapa të shpejtë. Pushuesit familjarë janë besnikët e plazheve të Borshit, duke u rikthyer aty vit pas viti.
Melita është një e re shqiptare, që prej vitesh jeton në New York , por pushimet zgjedh ti kaloj në Borsh, aty ku ka pushuar që fëmijë.
“Borshi ka qenë destinacioni kryesor kur isha e vogël, ne vinim këtu për pushime me familjen madje këtu kam mësuar të notoj. Para disa vitesh ka qenë shumë më ndryshe, është përmirësuar në kuptimin e mirë të fjalës. Ka më shumë vende për t’u akomoduar, hotele më të mira nga çfarë ka pasur më para, ka më shumë lëvizje turistash, deti po është gjithmonë i njëjti”, tha ajo për Euroneës Albania.
Qetësia, deti i pastër, çmimet e arsyeshme dhe nostagjia janë arsyet që e sjellin Melitën të pushoj, për çdo verë në bregdetin e Borshit.
“Edhe tani që jetoj në SHBA vendosa, që të kthehem pikërisht ketu bashkë më Nikun që t’i bëjmë pushimet tona në Borsh. Uji është shume i pastër, çmimet janë të lira është edhe shumë afër vendlindjes time, Gjirokastrës. Ndaj ja vlen të vish!”- theksoi ajo.
Për Nicholas disa ditë pushime i kanë mjaftuar për ta renditur Borshin si destinacionin e tij të preferuar, në Shqipëri.
“Çmimet janë të mrekullueshme dhe natyra është e mahnitshme. Po i shijojmë shumë pushimet këtu, jemi prej 4-5 ditësh kemi qenë edhe në Sarandë por ky këtu është definitivisht plazhi ynë i preferuar”, tha ai.
Teksa çifti i qëndron besnik Borshit, miqtë e tyre duan gjithashtu ta vizitojnë fshatin turistik dhe Shqipërinë.
“U dërgoj foto miqve dhe ata kanë kuriozitet të vijnë ta vizitojnë Shqipërinë, me sa shohë Shqipëria po kthehet në një destinacion turistik të preferuar dhe po më vjen mirë për këtë”, tha Melita.
Malet, deti e çmimet e arsyeshme po favorizojnë Borshin, për të pasur fluks të prezencës turistike./m.j
