Kryeqyteti është duke u shoqëruar edhe këtë fillimjavë me të reshura të borës. Të reshura këto që filluan ditën e premte sipas Institutit Hidrometeorologjik të Kosovës, do të ndërpriten të hënën, por temperaturat minimale dhe maksimalet do të jenë në vlerat negative pothuaj gjatë gjithë javës.
“Sipas parashikimeve të fundit, vendi ynë do të jetë nën ndikimin e masave të ajrit me presion stabil atmosferik duke vazhduar gjatë javës që këto masa të shënojnë vlera të mbinormales barike dhe si pasojë e kësaj gjendje nuk pritet të ketë temperatura shumë të ulëta, meqë gjatë rrugëtimit të këtyre masave me origjinë siberiane është zbehur fuqia vepruese e tyre, prandaj minimalet pritet të zbresin nga -13 deri -16 gradë Celsius, kurse temperaturat maksimale gjatë kësaj jave pritet të lëvizin nga -3 deri 2 gradë Celsius. Shtypja atmosferike në fundjavë do të rritet dhe si rezultat i saj do të rriten temperaturat minimale”, thotë njoftimi i IHMK-së. Në viset malore trashësia e borës ka arritur mbi 60cm.
