Reshjet e shiut dhe të dëborës që kanë përfshirë vendin ditët e fundit kanë shkaktuar probleme në qarkullimin rrugor në zonat e thella në Veri të vendit, ndërkohë që në Jug, Lumi Vjosë ka shtuar prurjet dhe rrezikon të dalë nga shtrati.
Dëbora ka zbardhur gjithë Qarkun e Kukësit. Në qytet, trashësia e saj shkon deri në 30 centimetra, ndërkohë që në zonat rurale tejkalon 50 centimetra. Si pasojë, akset rrugore në Zapod, Shishtavec, Topojan, Grykçaj, Kalis dhe Arren janë të pakalueshme.
Probleme ka edhe në Mat e Dibër. Në Mat, njësitë Xibër dhe Macukull janë bllokuar që prej mbrëmjes së djeshme dhe prej 15 orësh mungon energjia elektrike. Trashësia e dëborës kap 50 centimetra dhe vazhdon rënia e saj me intensitet të madh. Edhe në Dibër raportohet e njëjta situatë, ndërkohë që policia u ka bërë apel drejtuesve të mjeteve të mos lëvizin pa zinxhirë në disa akse.
Në vijim të reshjeve të dëborës në disa zona të vendit, Autoriteti Rrugor Shqiptar u ka sugjeruar udhëtarëve që të jenë të pajisur me zinxhirë, ndërsa ka rekomanduar dhe akset ku përdorimi i tyre është i domosdoshëm.
Kështu, përmes një njoftimi për shtyp ARRSH njofton se, qarkullimi me zinxhirë është i nevojshëm në akset Boboshticë-Dardhë, Korçë-Voskopojë; Pogradec-Qafë Plloçë, Podgorie-Liqenas, deri në Doganën e Goricës në juglindje të vendit.
Ndërkohë, në qarkun e Kukësit kalohet me zinxhirë aksi Tuneli i Thirrës-Kalimash-Morinë. Ndërkohë, në qarkun e Elbasanit, pavarësisht reshjeve akset rrugore janë të kalueshme pa nevojën e zinxhirëve.
Reshje bore po bien edhe në Qafën e Llogarasë, ku ndonëse fillimisht autoritetet nuk rekomanduan zinxhirët, në orët e mbrëmjes e vlerësuan të domosdoshëm përdorimin e tyre për të përshkuar aksin Vlorë-Himarë.
Po në orët e mbrëmjes, ARRSH ka dhënë të njëjtën direktivë edhe për akset: Librazhd-Pogradec, në Qafë Thanë; Milot-Mirditë dhe Mat-Bulqizë.
Gjithashtu, autoritetet kanë bërë thirrje që qytetarët në timon të ruajnë normat e shpejtësisë, të respektojnë sinjalistikën dhe të shmangin konsumimin e pijeve alkoolike.
Ja dhe lista e akseve:
Librazhd-Pogradec në Qafë Thanë
Pogradec-Korçë në Qafë Plloç
Korçë-Ersekë në Qafën e Qarrit
Vlorë-Himarë në Qafë Llogara
Milot-Mirditë
Kukës-Morinë
Mat-Bulqizë
Shirat
Në Jug, problematike janë prurjet e Vjosës. Reshjet e shiut dhe të dëborës në jug-lindje kanë rritur ndjeshëm nivelin e lumit, që rrezikon daljen nga shtrati. Zona më e rrezikuar nga kjo mbetet ajo e Novoselës.
Banorët kanë filluar ndërkohë të marrin masa për të shmangur humbjet në rast se vërshimi i Vjosës do të vazhdojë.
